Xəbər verdiyimiz kimi, ötən gün Milli Məclisin keçirilən plenar iclasında deputat Səyyad Salahlının çıxışı geniş müzakirələr və təndiqlərə səbəb olub.
Deputat insanların vəziyyətinin yaxşı olduğunu, hər kəsin normal yaşadığını iddia edib: "Allaha şükür, camaatın vəziyyəti yaxşıdır. Gözləyirlər ki, dövlət insanlara pul töksün, traktor versin . Gedin 10 nəfər yığışıb traktor alın. Heç kimə də minnət etməyin”.
Bu fikirlər isə, cəmiyyətdə birmənalı qarşılanmayıb.
AZXEBER.COM mövzu ilə bağlı Səyyad Salahlı ilə əlaqə saxlayıb. Deputat fikrinin üstündə qaldığını, insanların keçmiş yaşayış qaydalarını unuda bilmədiyini, bazar iqtisadiyyatı dövründə yaşadığımız üçün hər kəsin özünə gün ağlamalı olduğunu bildirib:
"Düşünürəm ki, bu barədə artıq nəsə deməyə ehtiyac yoxdur. Konkret olaraq yanlış anlamaq insanların öz işidir. Bazar iqtisadiyyatı dövründə yaşayırıq. Hamı özünə gün ağlamalıdır. Hərə bir işin qulpundan yapışmalıdır. İnsanlar gözləməməlidirlər ki, dövlət onlara nəsə verəcək. Dövlət artıq insanlara torpağı paylayıb. Onun hansı aspektdə becərilməsi insanların özlərinə qalıb. Nəsə çatmırsa, insanlar bunu özləri əldə edib, özlərinə gün ağlamalıdırlar. Özlərinə rəhbər seçməli və o rəhbərin başçılığı ilə təsərrüfatın müxtəlif sahələri ilə məşğul olmalıdırlar.
Gözləməli deyillər ki, hardansa onlara pul gələcək. İnsanlar hələ də keçmiş adət-ənənələri, yaşayış qaydalarını unuda bilmirlər. Düşünürlər ki, kimsə onlara gətirib pul verəcək, yardım göstərəcək. Bu isə ümumiyyətlə belə olmalı deyil”.
Oksana Orucova
