"Azərişıq” ASC Cəlilabad və Masallı rayonlarının bir sıra kəndlərində elektrik təsərrüfatını yeniləyir.
AZXEBER.COM bu barədə səhmdar cəmiyyətinə istinadən xəbər verir.
Məlumata görə, Prezident İlham Əliyevin tapşırıqlarına əsasən vətəndaşların dayanıqlı və fasiləsiz elektrik enerjisi ilə təmin olunması məqsədilə paytaxt və regionlarda yenidənqurma işləri davam etdirilir.
Cəlilabadın Komanlı, Rüstəmabad və Bəcirəvan kəndlərində 0,4 və 10 kV-luq yeni metal dayaqlar əkilir, müasir elektrik xətləri çəkilir, açıq naqillərin yerinə müasir tipli Özünüdaşıyan İzolyasiyalı Naqillər (ÖİN) çəkilir. Köhnəlmiş sayğaclar həyətyanı sahələrdən kənarlaşdırılaraq yeni smart sayğaclarla əvəz olunur. Ümumilikdə 9 Kompleks Transformator Məntəqəsinin (KTM) quraşdırılması nəzərdə tutulub.
Masallının Köhnə Alvadı kəndində də ötən əsrin 60-cı illərində quraşdırılmış elektrik şəbəkəsi yenisi ilə əvəzlənir. Kənddə 0,4 kV-luq ÖİN çəkilişi və yeni sayğacların quraşdırılması davam edir. Həmçinin elektrik enerjisinə artan tələbat nəzərə alınaraq 10 KTM quraşdırılacaq.
Lürən kəndində 0.4 kV-luq dayaqların basdırılması, elektrik xətlərinin yenilənməsi işləri başa çatıb. Hazırda 10 kV-luq yeni dayaqlar əkilir, ÖİN-3 kabel xətləri çəkilir.
"İstehlakçıları keyfiyyətli elektrik enerjisi ilə təmin etməklə yanaşı elektrik enerjisi itkilərini minimuma endirməyi hədəfləyən "Azərişıq” Cənub regionu ilə yanaşı ölkənin bütün bölgələrində, eləcə də işğaldan azad edilmiş Qarabağ və Şərqi Zəngəzurda quruculuq və əsaslı təmir işlərini davam etdirir", - deyə məlumatda qeyd olunub.
