Leyla Namazova
Ötən gün anamla dükana gedəndə yanında 6-7 yaşlı uşaq olan bir qadınla rastlaşdım. Ananın üzünün əzələləri bir qədər dartılmışdı, əsəbi olduğu açıq-aşkar sezilirdi. Səbəb sadə idi: uşaq hamının yanında ayağını yerə döyüb, "Çipsi” və "Pepsi” istəyir, qadın isə onun bu arzusunu yerinə yetirməkdən imtina edirdi.
Ananın səsi aləmi başına götürmüşdü: "Boğazında qalsın. Daha bəsdir, canımı boğazıma yığdın. Məndə pul yoxdur. Get, atandan pul al. Səni görüm öləsən. O zəhəri yeməsən ölərsən? Səni doğduğum günə qara daş düşəydi. Sənə də nifrət edirəm, o bivec atana da...”
Ana ilə uşaq arasındakı bu dava-dalaş hamını mütəəssir etmişdi. Uşaq başını aşağı salıb, hönkür-hönkür ağlayır, arabir pencəyinin qolu ilə gözünün yaşını silir, sonra yenə səsinə güc verirdi. Qadın ətrafdakı insanların onu kinli baxışlarla süzdüyünü görəndə, uşağı döyə-döyə dükandan bayıra çıxardı. Amma hirsi soyumadığı üçün səkidə ayaq saxlayıb, oğlunun başına daha bir qapaz ilişdirdi.
Məni dəhşət bürümüşdü. Gözlərimə inana bilmirdim. Qadına heç cür bəraət qazandıra bilmirdim. Nəyinə bəraət qazandıracaqdım zatən?
Başa salmaq o qədər çətindi? Gərək o qədər insani keyfiyyətlərini itirəsən ki, uşaqla lazımsız əşya kimi, ən dəhşətlisi heyvan kimi davranasan.
İlahi, necə analar varmış! Heç ana da övladına əl qaldırar?! Bəs uşaq psixoloji travma alsa, onun axırı necə olacaq?
Gələcəkdə bu balaca uşaq cəmiyyəti necə sevəcək, ay "ana”? Əgər qayğı göstərə bilməyəcəkdinsə, sevə bilməyəcəkdinsə, niyə dünyaya gətirirdin?
Belə qadınlara ana deməyə adamın dili gəlmir. Axı analıq təkcə bioloji faktor deyil. Analıq - sevgidir, qayğıdır, nəvazişdir. Analıq - ən uca zirvədir. Heyf ki, bəzi "ana" lar bu sözün mənasını dərk etmir.
Bəziləri övladlarına əsl ANA ola bilmirlər. Hərdən mənim bu sözə heyfim gəlir. Hər "doğan" qadına da ana demək olmaz, onlar ana deyil... Cəmiyyət üçün "dünyaya uşaq gətirən" varlıqlardı".
Onların məqsədi dünyaya uşaq gətirib, "ana" statusu qazanmaqdı, vəssalam!
Sonra isə uşağı döymək də olar, söymək də, hətta "uşaq mənimdir, özüm bilərəm, siz kimsiniz" - deyib, camaatın üzünə bozarmaq da....
