Xəbər verdiyimiz kimi, Azərbaycan XİN rəhbəri Ceyhun Bayramov yaxın zamanda erməni həmkarı ilə görüşəcək.
Bu barədə xarici işlər naziri Ceyhun Bayramov məlumat verib.
Nazir bildirib ki, xarici işlər naziri Ararat Mirzoyanla ən son Bişkekdə bir sıra məsələlər ətrafında fikir mübadiləsi aparılıb.
Siyasi şərhçi Aydın Tağıyev AZXEBER.COM-a açıqlamasında deyib ki, bu addım Bişkekdə baş tutan son təmasların davamı olaraq, dialoqun daha sistemli və rəsmi müstəviyə daşındığını göstərir:
"Ceyhun Bayramovun Ararat Mirzoyanla yaxın zamanda keçirilməsi planlaşdırılan görüşü, Azərbaycan-Ermənistan münasibətlərində sülh prosesinin ardıcıllığını nümayiş etdirir. Bu addım Bişkekdə baş tutan son təmasların davamı olaraq, dialoqun daha sistemli və rəsmi müstəviyə daşındığını göstərir. Görüşün əsas məqsədi tərəflər arasında etimadı gücləndirmək və mübahisəli məsələlərin müzakirəsini davam etdirməkdir”.
O qeyd edib ki, görüş sülh prosesinin davamlılığı üçün mühüm addımdır:
"Hesab edirəm bu, həm də regionda sabitliyin möhkəmlənməsi üçün mühüm siyasi siqnaldır. Azərbaycan tərəfi sülh gündəliyini irəli aparmaqda ardıcıl mövqeyini nümayiş etdirir, Ermənistan isə bu prosesdə öz siyasi iradəsini ortaya qoymalıdır. Belə görüşlər, tərəflərin gələcəkdə sülh müqaviləsinə daha yaxınlaşmasına zəmin yaradır. Nəticə etibarilə, bu görüşün uğuru bölgədə yeni əməkdaşlıq imkanlarının açılmasına yol aça bilər. Fikrimcə görüş sülh prosesinin davamlılığı üçün mühüm addımdır”.
"Əgər tərəflər konkret hüquqi və siyasi razılaşmalara yaxınlaşa bilsələr, ilin sonuna qədər sülh müqaviləsinin imzalanması real görünür. Lakin bunun üçün Ermənistanın Konstitusiyasında dəyişikliklər və qarşılıqlı etimadın gücləndirilməsi vacibdir”,-deyə ekspert bildirib.
Şahanə Ziyad
