Ceyhun Məmmədov: “İran prezidentinin Qarabağ səfəri regionda yeni reallığın göstəricisidir”

AZXEBER.COM xəbər verir ki, bu fikirləri "Hədəf" verilişinin bugünkü qonağı, Milli Məclisin deputatı Ceyhun Məmmədov səsləndirib.

"Azərbaycan ölü təşkilatları diri təşkilatlara çevirir. Qoşulmama Hərəkatı əvvəllər o qədər də güclü bir təşkilat deyildi. Azərbaycan bu təşkilata rəhbərlik etdi, onun parlament şəbəkəsini yaratdı, gənclər şəbəkəsi formalaşdırıldı. Bu gün həmin təşkilat ən güclü beynəlxalq qurumlardan birinə çevrilib və  ikinci böyük beynəlxalq təşkilatdır.

Eyni zamanda İqtisadi Əməkdaşlıq Təşkilatına (İƏT) da Azərbaycan yeni nəfəs verdi. Biz heç vaxt bu qədər genişmiqyaslı bir forumun şahidi olmamışdıq. Bu, sadə məsələ deyil. İlk dəfə İƏT həftəsi keçirildi: Qadınlar Forumu Laçında, Gənclər Forumu Ağdamda, Biznes Forumu Şuşada, Ümumi Sammit isə Xankəndidə təşkil olundu. Bu da Azərbaycanın yaratdığı reallığın növbəti təsdiqidir.

İranla bağlı məsələyə gəldikdə isə mən bunu cənab Prezidentin növbəti siyasi nailiyyəti hesab edirəm. 2020-ci ilə və ondan sonrakı dövrə qədər İran daim Ermənistanın yanında olmuş, onu dəstəkləmişdir. Son dövrlərə qədər İran daxilində bu istiqamətdə proseslərin getdiyini müşahidə edirdik.

İran prezidentinin Qarabağa, Xankəndiyə səfəri, Prezidentlə birlikdə Şuşanı ziyarət etməsi, səmimi görüşləri Azərbaycanın yaratdığı yeni reallığı bir daha nümayiş etdirir. Bu, İranın mövqeyində baş verən ciddi dəyişiklikdir. Səfər zamanı qeyd olunduğu kimi, İran daxilində müəyyən təxribatlar oldu. Hətta onların keçmiş diplomatlarından biri bəzi bəyanatlar verdi, guya əllərində hansısa məlumatlar var. Bu kimi addımlar səfərin baş tutmaması üçün planlaşdırılmışdı. Lakin səfər uğurla baş tutdu. Düşünürəm ki, bu, Azərbaycan-İran münasibətlərində yeni bir səhifənin, yeni və mühüm bir mərhələnin başlanğıcıdır.

İran bu gün təcrid olunmuş vəziyyətdədir. Eyni vəziyyəti Rusiya ilə bağlı da söyləmək olar. Buna baxmayaraq, hər iki dövlət bu əməkdaşlıqda maraqlı olmalıdır."