Xəbər verdiyimiz kimi, bu gecə Azərbaycanın ilk telekommunikasiya peyki orbitə çıxarılıb.Sosial şəbəkələrdə bu xəbərin sevincini yaşayıb.
Millət vəkili Ceyhun Osmanlı da şəxsi “facebook” profilində günün ən aktual mövzusuna toxunub. Deputat statusuna sözləri Teymur Elçinin, musiqisi Fikrət Amirovun olan “Uçdu göylərə bizim peykimiz” mahnısının sözləri ilə başlayıb və sonra əlavə edib:
“Bu sözləri yəqin ki, 20 yaşdan yuxarı azərbaycanlılar əzbər bilir. Qaqarin və ondan sonrakı Sovetlər dövrünün "Kosmos nəsli" arasında, hətta bu nailiyyətlərə imza atan alimlər arasında azərbaycanlılar da var idi. Amma bütün bu uğurlar Sovet bayrağı altında həyata keçirilirdi və Rusiya Federasiyasının özünü Sovet İttifaqının varisi elan etdikdən sonra ruslar başladı deməyə ki, elə bu onların uğuru idi. Amma azərbaycanlılar bu nəğməni və "Sehrli xalat" filmindən də görsəndiyi kimi Rəşidin gələcəyə getmək xəyalını unutmadı. Uca Allah isə heç bir zaman nəsib etməyəcəyi bir şeyin xəyalını qurdurmaz və ya necə deyərlər, niyyətin hara, mənzilin ora. Və bu xəyalımız da gerçəkləşdi. Azərbaycanın ilk telekommunikasiya peyki orbitə çıxarıldı. Həm də bu prosesin idarəçiliyi əksəriyyəti azərbaycanlılardan formalaşan bir qrup tərəfindən həyata keçirilir. Artıq Azərbaycan kosmik klubun üzvü olan az sayda ölkələrdən biridir və bayrağımız ən yüksək zirvələri fəth edir. Amma Qaqarini də unutmaq olmaz. Məsələn, Şəkidə olanlar bilir ki, orada ən yaxşı piti restoranlarından biri Qaqarin adınadır (gülür) Millət vəkili bildirib ki, peyk vasitəsilə yüksək sürətli internet və TV-lərimizin keyfiyyətli yayımına nail olunacaq: “Biz isə Azrspace 1, Azerspace 2 və s. kosmik uğurlara imza atan böyük vizyon sahibi insanlarımızdan yeni uğurlar gözləyirik. İlkin olaraq yəqin ki, ölkəmizin hər bir köşəsində yüksək sürətli internet və tv-lərimizdə keyfiyyətli görüntü bu peyk vasitəsilə nəsibimiz olacaq. Təbriklər və təşəkkürlər, Azərbaycan! Təbriklər və təşəkkürlər, Cənab Prezident!
