Milli Məclisin deputatı Ceyhun Osmanlı Sloveniyada səfərdə olub.
Avronest Parlament Assambleyasında Azərbaycan nümayəndə heyətinin rəhbəri, Milli Məclisin deputatı Elxan Süleymanovun başçılıq etdiyi nümayəndə heyəti tərkibində Sənaye və energetika naziri Natiq Əliyev, Milli Məclisin deputatları Qüdrət Həsənquliyev, Fazil Mustafa iştirak edib.
Azərbaycan nümayəndə heyəti Sloveniya parlamentində Dağlıq Qarabağla bağlı keçirilən dinləmələrdə iştirak ediblər.
Dinləmələrdə Ermənistanın Azərbaycana qarşı hərbi təcavüzünə, işğalçı dövlət tərəfindən aparılmış etnik təmizləmə siyasəti nəticəsində bir milyona yaxın soydaşımızın insan hüquqlarının kütləvi və kobud şəkildə pozulmasına, ölkəmizə dəymiş maddi və mənəvi zərərin miqyasına dair məsələlər müzakirə edilib.
Səfər çərçivəsində Azərbaycan nümayəndə heyəti Milli Assambleyanın sədri Yanko Veber, qurumun xarici siyasət və avropa ittifaqı məsələləri komitələrinin üzvləri, Sloveniyanın Baş naziri Alenka Bratusik, Sloveniya parlamentinin xarici əlaqələr komitəsinin sədri Janja Klasinc Lüblyanada, eləcə də Sloveniya–Azərbaycan dostluq qrupunun üzvləri ilə görüşüb.
Görüşlərdə Ermənistan-Azərbaycan, Dağlıq Qarabağ münaqişəsi barədə məlumat verilib və vurğulanıb ki, münaqişə nəticəsində Azərbaycan torpaqlarının indiyədək işğal altında saxlanılması müstəqillik dövründə ölkəmizin qarşılaşdığı ən böyük problemdir. Münaqişənin beynəlxalq hüququn normaları və prinsipləri çərçivəsində həllinə nail olunması Azərbaycanın xarici siyasət fəaliyyətinin əsas istiqamətlərindəndir. Eyni zamanda qeyd edilib ki, Azərbaycan Avropanın enerji təhlükəsizliyinin təmin edilməsində strateji rol oynayır. Azərbaycanın Avropa İttifaqının “Şərq tərəfdaşlığı” Proqramının iştirakçısı və Avronest Parlament Assambleyasının təsisçilərindən biridir.
Həmçinin görüşlərdə tarixi qardaşlıq əlaqələri və əməkdaşlıq perspektivləri müzakirə olunub.
Millət vəkili Ceyhun Osmanlı Sloveniya parlamentinin xarici əlaqələr komitəsində Dağlıq Qarabağla bağlı təqdimat edib. Bildirilib ki, Ermənistan-Azərbaycan, Dağlıq Qarabağ münaqişəsi nəticəsində on minlərlə insan həlak olub, bir milyondan artıq azərbaycanlı isə qaçqın və məcburi köçkünə çevrilib. Minsk qrupunun vasitəçilik səyləri indiyədək hər hansı bir nəticə verməyib. Münaqişə açıq olaraq qalır və istənilən vaxt təhlükəli miqyasda böhrana çevrilə bilər.
Azərbaycan və Ermənistandakı demoqrafik vəziyyət, iqtisadi vəziyyət, konfliktin sosial təsirləri, beynəlxalq təşkilatların qəbul etdiyi qərarlar və s haqda da geniş bəhs edilib.
Qeyd edək ki, Sloveniya parlamentinin xarici əlaqələr komitəsi işğalı qınayan və Avropanın Şərq sərhədində stabilliyə təhlükə olan bu münaqişə ilə bağlı bəyanatla çıxış edib.
