COP29-un Baş danışıqçısı, xarici işlər nazirinin müavini Yalçın Rəfiyev COP29 komandasının əsas iş istiqamətlərindən danışıb və bildirib ki, konfransın yekun sənədləri ilə bağlı proses hələ başlamayıb.
AZXEBER COM report-a istinadən xəbər verir ki, o, bunu VI Ümumdünya Forumu çərçivəsində "Yaşıl gələcəyə davamlı yol: COP29 və sonrakı dövr üçün birgə fəaliyyət” mövzusunda keçirilən iclasda deyib.
"COP29 komandası hazırda əsas məsələlər üzrə üç vacib sahədə işləyir. Birincisi, danışıqlar prosesinə hazırlıqdır. COP29-un yekun sənədləri ilə bağlı danışıqlar prosesi hələ başlamayıb. Lakin bu prosesə hazırlıq çərçivəsində prosesin tərəfsiz iştirakçıları, müxtəlif dövlətlərlə onların mövqeyini öyrənmək üçün fəal məsləhətləşmələr aparılır”, - o bildirib.
Y.Rəfiyev vurğulayıb ki, ikinci istiqamət olaraq, COP29-un sədrliyinin, digər ölkələrin və təşkilatların təşəbbüsləri haqqında məlumatları alıb təhlil edirlər: "Onlara əsaslanaraq fəaliyyətimiz üçün gündəlik hazırlayırıq. Üçüncü istiqamət Azərbaycanın milli səviyyədə həyata keçirməli olduğu tədbirlərdir, qlobal miqyasda nümunə göstərmək üçün hansı addımları atmalıdır. Bu istiqamətdə də məsləhətləşmələr aparılır”.
