İşğaldan azad olunan Qarabağımızda abadlıq və quruculuq işlərinin genişlənməsi ilə yanaşı, Azərbaycanın hər bir guşəsində, eləcə də paytaxtımızda abadlıq-quruculuq işləri davamlı olaraq uğurla həyata keçirilir.
Son illərdə Bakıda və şəhər ətrafı ərazilərdə salınan parkların sayı gündən-günə artır. Havalar isindikcə axşam saatlarında və həftə sonları parka üz tutan sakinlərin sayı daha çox olur. İnsanlar iş gününün sonunda yolunu parkdan salaraq təmiz hava qəbul edir, ailə üzvləri ilə birgə istirahət guşələrinə toplaşır və səmərəli vaxt keçirirlər. Təəssüf ki, bəzi şəhərətrafı ərazilərdə isə insanların istifadəsinə verilmiş parklar uzun illər təmirsiz qaldığından yararsız vəziyyətdədir. Belə parklardan biri Nərimanov rayonunda yerləşən Şəhriyar adına salınmış parkdır.
Unudulmaz söz ustadı, Cənubi Azərbaycanın görkəmli şairi Məhəmmədhüseyn Şəhriyarın adına salınmış bu parka aidiyyatı qurumların münasibəti olduqca biganədir. Park uzun illərdir ki, baxımsız qaldığından artıq yararsız bir haldadır və demək olar ki, parkda ağacların quruması, oturacaqların sınıq-salxaq olması, hovuzun quruması parkı bilinməz bir xarabalığa bənzədir. Vaxtı ilə parka üz tutan paytaxt sakinləri üçün nəzərdə tutulmuş istirahəhət guşələrinin ətrafının artıq 30 santimetr hündürlüyünə qədər çatmış yabanı otlar basmışdı. Ətrafa səpələnmiş məişət tullantıları, qurumuş ağaclar bir zamanlar yaz fəslinin təravətini özündə əks etdirən bu parkı bir cəngəlliyə çevirmişdi.
Boynunu büküb qəmgin baxan skamyalar artıq insanların əyləşməsi üçün təhlükəli hesab olunurdu. Əhalinin istirahəti üçün nəzərdə tutulan əsas sahə isə demək olar ki, baxımsız, qurumuş ağaclarla əhatələnən çayxanalar, köhnə attraksionlar, sınıq-salxaq skamyalar böyük şairimizin adını daşıyan bu parkın aqibəti ilə bağlı sakinləri də narahat edir. Onların fikrincə öncələr burda müxtəlif tədbirlər, konsert programları təşkil olunur,bahar bayramı isə bir ayrı özəlliklə keçirilirdi.
Bu parkdakı vəziyyəti görən insanlar, uşaq və qocalar axır illərdə demək olar ki, bura az gəlirlər. Biz görmüşük ki, bir istirahət parkında bir və ya iki çayxana mövcud idi.
Şəms Hüseynli
