Demet Akalın Samir Bağırovla birgə konsert verəcək
MAQAZİN
18:59 29.11.2012
2723
Türkiyənin məşhur pop müğənnisi azərbaycanlı müğənni Samir Bağırovla birlikdə konsert vermək istəyir. Estrada müğənnimizin prodüseri vəzifəsini yerinə yetirən stilist Samir Əliyevin verdiyi məlumata görə, Türkiyənin prodüser mərkəzlərinin birindən onlara təklif gəlib: "Onlar mənimlə telefon əlaqəsi yaradaraq, Demet Akalının Samir Bağırovla eyni səhnəni bölüşmək arzusunda olduğunu bildirdilər. Sən demə o, Samir Bağırovun bütün disklərini, kliplərini izləyib və ifasını çox bəyənib. Samirin mahnılarından birini duet oxumaq istəyir. Təşkilatçılar da onun bu arzusunu reallaşdırmaq məqsədilə hər iki müğənninin Bakıda konsertini təşkil etmək qərarına gəlib".Təşkilatçılar Demet Akalınla Samir Bağırovun Bakı konsertini Yeni il gecəsində təşkil etməyi düşünürlər. S.Əliyev təşkilatçıların Samir Bağırovun qonorarı ilə maraqlandıqlarını da deyib: "Onlar məndən Samir Bağırovun hansı qonorara konsert verdiyini soruşdular. Mən də məbləği söylədim. Razılaşdılar".Qeyd edək ki, türkiyəli təşkilatçılar Samir Bağırovla görüşmək üçün bu günlərdə Bakıya səfər edəcək.
