"Düşünürəm ki, "Media haqqında” qanunun qəbulu çox vacibdir. Təbii ki, bu qanun birinci oxunuşda Milli Məclisin Plenar iclasında tövsiyə olunub və yəqin bunun müzakirəsi də keçiriləcək. Ümumi baxdıqda burada çap mediası üçün, audovizual media üçün, eyni zamanda saytlar, jurnalistlər, agentliklər üçün maddələr yer alıb. Bunun ciddi müzakirəsi də olacaq. Ümumi götürəndə bu mütərəqqi bir qanundur və istənilən problemin həllində mütləq şəkildə bir qanuna istinad etmək üçün bir imkan yaranıb”.
Bu sözləri AZXEBER.COM-a açıqlamasında Milli Məclisin deputatı Arzu Nağıyev "Media haqqında” Qanun layihəsinə fikirlərini bildirərkən deyib.
Deputat qeyd edib ki, hazırki vəziyyətdə bu qanunun qəbul edilməsi müsbət adddımdır:
"Hazırki vəziyyətdə media, jurnalistika sahəsi diqqətdə saxlanılır və bununla bağlı islahatlar aparılır. Bu gün media haqqında belə bir qanunun qəbul edilməsi düzgün addımdır və mediada müsbət irəliləyişlərə səbəb olacaq. Qanun qəbul edildiyi təqdirdə jurnalistlərlə bağlı suallara aydınlıq gələcək, yəni o, kim olduğunu, medianın əsas mahiyyətini, əsas səlahiyyət və öhdəlikləri dərk edə biləcək”.
Arzu Nağıyev qeyd edib ki, yeni qanun layihəsi ölkəmizdə medianın inkişafına təkan verəcək:
"Bildiyimiz kimi, İkinci Qarabağ müharibəsi dönəmində ölkəmiz üçün vacib məsələlərdən biri də informasiya müharibəsi oldu. Hətta Ali Baş Komanda İlham Əliyev də müxtəlif dillərdə informasiya müharibəsi apardı. Müharibə bitsə də, bu gün də reallıqları dünyaya çatdırmaq üçün Azərbaycanda ciddi media qurumlarının fəaliyyəti tənzimlənməlidir. Ona görə də, fikrimcə "Media haqqında” Qanun layihəsi ölkəmizdə medianın inkişafına ciddi təkan verəcək və Azərbaycan mediası dünyaya inteqrasiya edəcək”.
Aydın Nuri
