Mayın 14-də Azərbaycan və Ermənistan liderlərinin Brüssel görüşü öncəsi Ermənistan növbəti dəfə təxribata əl atıb.
Bu vacib görüş öncəsi Ermənistanın bu təxribatı nəyə hesablanıb?
Milli Məclisin deputatı Elşad Mirbəşiroğlu AZXEBER.COM-a açıqlamasında bu haqda danışıb.
"Ermənistan Brüssel görüşü öncəsi hər zaman olduğu kimi yenə də təxribatlar törətməkdədir. Nəzərə almaq lazımdır ki, mayın 14-ü Brüsseldə növbəti üçtərəfli görüş keçiriləcək. Ermənistanın məqsədi ondan ibarətdir ki, bu görüş zamanı özünü zərərçəkmiş tərəf qismində təqdim etsin. Mühüm görüşlərdən əvvəl Ermənistan ənənəvi olaraq atəşkəsi pozur. Çalışır ki, müzakirələr zamanı Azərbaycana qarşı hansısa fikrin formalaşmasına nail olsun. Bu təxribatlar regionda gərginliyin hələ də qaldığını, münaqişənin hələ də davam etdiyi fikirlərini formalaşdırmağa hesablanıb”.
Elşad Mirbəşiroğlunun sözlərinə görə, Ermənistan çalışır ki, regiona üçüncü güclərin cəlb olunması üçün şərait yaratsın:
"Bu istiqamətdə Ermənistanın cəhdləri Avropa İttifaqının müşahidə missiyasının Ermənistana göndərilməsi ilə nəticələndi. Lakin bu ciddi təsir göstərmədi. Azərbaycan başlatmış olduğu sülh gündəliyini irəli aparmaqdadır. Ermənistanın təxribatlarının nəticəsi elə Ermənistanın özü üçün ağır olur. Azərbaycan tərəfi bu təxribatların qarşısını qətiyyətlə alır. Biz prosesi dinc vasitələrlə inkişaf etdirmək niyyətini hər zaman nümayiş etdiririk. Lakin Ermənistan tərəf özünün qeyri-konstruktiv mövqeyindən çəkilmir. Azərbaycan Laçın yoluda nəzarət-buraxlış məntəqəsini qurdu. Ermənistana dəfələrlə çağırış edildi ki, Azərbaycan ərazilərində separatizmi dəstəkləməsin. Ermənistan isə bunun əksini edirdi. Bu yanaşmanı sülh prosesinə də şamil etmək olar. Biz məsələni dinc vasitələrlə yoluna qoymağa çalışırıq. Ermənistan hələ də Azərbaycanın siyasi jestlərini düzgün qiymətləndirməyi bacarmayıb”.
Şəbnəm Zahir
