"Prezident İlham Əliyevin rəhbərliyi dönəmində xalq qarşısında verdiyi bütün vədləri tam olaraq yerinə yetirməsi onu deməyə əsas verir ki, xalq öz seçimində yanılmayıb. Ulu öndər Heydər Əliyevin siyasi kursunu davam etdirən İlham Əliyev 20 il ərzində Azərbaycanı təsəvvür olunmayacaq dərəcədə güclü və bütöv bir ölkəyə çevirdi”.
Bu sözləri AZXEBER.COM-a açıqlamasında deputat Vüqar İskəndərov deyib.
O, həmçinin bildirib ki, ölkəmiz sosial yönümlü ölkə olduğundan atılan bütün addımlar vətəndaşlarımızın rifahı üçün hesablanıb:
"Bütün sahələrdə inkişaf nəzərəçarpacaq dərəcədə olsa da xüsusilə sosial-iqtisadi sahəni qeyd etmək yerinə düşər. Çünki cənab prezident həmişə islahatların mərkəzində Azərbaycan vətəndaşının olmasını prioritet hesab edib. Ölkəmiz sosial yönümlü ölkə olduğundan atılan bütün addımlar vətəndaşlarımızın rifahı üçün olub. Əbəs yerə deyil ki, son 20 il ərzində ümumi daxili məhsul (ÜDM) 6,2 milyard ABŞ dollarından 78,7 milyard ABŞ dollarına çatıb və ÜDM-nin real həcmi 4 dəfə, dövlət büdcəsinin xərcləri 30 dəfə artıb. Əgər 2003-cü ildə adambaşına düşən büdcə xərcləri 150 manatdan az idisə, hazırda bu rəqəm 3500 manatdan çoxdur.
Deputat ölkədə yoxsulluq səviyyəsi də kəskin şəkildə azaldığını deyib: "2003-cü illə müqayisədə 2022-ci ildə yoxsulluq səviyyəsi 44,7 faizdən 5,5 faizə enib, orta aylıq əməkhaqqı 77.4 manatdan 839,4 manata yüksəlib. Bütün bunlar da əlbəttə borclanmayla yox, ölkəmizin öz kapitalı hesabına baş verib. Ölkənin xarici ticarət dövriyyəsi 3,8 milyard ABŞ dollarından 52,7 milyard ABŞ dollarına yüksəlib. Qeyri-neft-qaz ÜDM-i 4,1 milyard ABŞ dollarından 41,1 milyard ABŞ dollarına çatıb. Birbaşa xarici borcun həcmi azalaraq hazırda ümumi daxili məhsulun 9,3 faizini təşkil edir. Bu cür faktları çox sadalamaq olar. Bütün bunların da memarı məhz prezident İlham Əliyevdir. Hazırda isə qarşımızda daha boyük hədəflər var. Qarabağı bərpa etmək, sakinləri köçürmək və bu kimi məsələlər prioritet məqsədlərdir. 20 il ərzində prezidentimiz düşünülmüş siyasət nəticəsində necə ki bütün vədlərini yerinə yetirib, bundan sonrakı dönəmdə də xalq-iqtidar birliyi ilə ölkəmiz daha böyük uğurlara imza atacaq”.
