Deputat Məlahət Ibrahimqızı diasporla iş üzrə dövlət komitəsinin rəhbəri Nazim Ibrahimovu tənqid edib. Deputat modern.az saytına müsahibəsində deyib ki, dövlətin Diasporla Iş üzrə Dövlət Komitəsinə verdiyi dəstək, ayırdığı vəsait, yaratdığı şərait onun fəaliyyətinin nəticələrinə uyğun gəlmir:
“20 ilə yaxın müddətdir biz Qarabağ problemini yaşayırıq. Diaspor Komitəsinin xətti ilə Qarabağ problemi, Xocalı soyqırımı ilə bağlı yetərli nailiyyətlər əldə olunmayıb. Heydər Əliyev Fondunun Rusiya nümayəndəsi tək öz fəaliyyəti ilə, ”Xocalıya ədalət” kampaniyası ilə bütün dünyanı tərpətdisə, ayrı-ayrı böyük beynəlxalq qurumlarda bununla bağlı sənədlər qəbul etdirdisə, demək ki, bir təşkilatın filialı buna nail oldu. Biz bütün dünyanı əhatə edən Diasporla Iş üzrə Dövlət Komitəsinin bu sahədə imkanlarından yetərincə istifadə etməmişik. Hesab edirəm ki, komitə bu istiqamətdə də çox böyük işlər görməlidir”.
Məlahət Ibrahimqızı bu fikirlərilə həm də Diasporla Iş Üzrə Dövlət Komitəsində korrupsiya faktlarının olmasına diqqət çəkib.
Nazim Ibrahimova qarşı oxşar ittihamlar bundan əvvəl də səsləndirilib. Özü də hökumət düşərgəsində təmsil olunan şəxslər tərəfindən. Bir müddət əvvəl isə məlumat yayılmışdı ki, Ilham Əliyev artıq Nazim Ibrahimovla vidalaşmaq niyyətindədir. Görünür, komitə sədrinin son vaxtlar tənqid atəşinə tutulması bununla bağlıdır.
