Millət vəkili: "Bizə o cür uşaqlar lazım deyil"
“Təbiətin qanununu pozanda təbiət bizi biseksualizm, eynicins nikahların bağlanması ilə cəzalandırır”.
AZXEBER.COM-un məlumatına görə, modern.az-a açıqlama verən millət vəkili Hadı Rəcəbli bildirib ki, çoxuşaqlılığın təbliğinə dair Milli Məclisə heç bir qanun layihəsi daxil olmayıb və ümumiyyətlə belə bir ideya da yoxdur: “Amma bunu müzakirəyə ehtiyacı var. Belə bir qanun layihəsi o ölkələrdə ola bilər ki, həmin ölkələrdə əhalinin artımı yoxdur. Məsələn, Rusiyada, Avropada və s. onlarda əhalinin artımı çox aşağı səviyyədədir. Ancaq bizdə əhali ildə 130 min nəfər artır. Təxminən 18 ildən sonra nə edəcəyik? Məktəb, iş, ev, geyim, iş yeri və s. Deməli, bizi həvəsləndirmə yerimiz yoxdur. Bizdə ailələrin elə bir qanun qəbul olunsa, ən çox uşaq hansı ailələrdə olacaq? Təbii ki, ancaq kasıb ailələrdə. Elə bir misal çəkim sizə. Lənkəranda bir kəndə getmişdim, orada mən millət, xalq deyərək populist çıxış etdim. Dedim, ordu üçün əsgər hazırlamalıyıq, uşaqlarımız çox olmalıdır. Bir nəfər qalxıb dedi ki, “ay Hadı müəllim, vallah düz deyirsiniz. Qonşumuzda bir Həsənqulu kişi var, özü də dəlidir, arvadı da. 14 uşağı var, bizə o cür uşaqlar lazım deyil”. O düz deyir. Biz əksinə, nə etməliyik? Azərbaycanda nikaha girənlərin 10%-nin övladı olmur. 90 min cütlük nikaha girirsə, onlardan 9 mininin uşağı olmur. İkincisi mühüm məsələ isə uşaq ölümləridir. 3 yaşına qədər olan uşaqların ölüm halları çoxdur. Üçüncüsü, pullu kişilərin niyə çox uşaqları olmur? 6 it saxlayırlar, nə üçün? Gəlin onlara irad tutaq, deyək ki, sən də kişisən? 6 maşının və 1 uşağın var. Qoy pulluların uşağı çox olsun. Çünki onlar övladlarına yaxşı təhsil verə, sağlam uşaq böyüdə bilirlər”. Uşaqların cinsinin müəyyənləşdirilməsi məsələsinə də toxunan Hadi Rəcəbli bildirib ki, abort hər zaman müzakirələrə səbəb olur. Deputatın sözlərinə görə, Azərbaycanda da abort qadağandır: “Uşağın cinsi müəyyənləşəndən sonra onun abortu qadağan edilir. Ancaq hansısa xəstəlik hallarında aborta icazə verilir. Hamiləliyi yarımçıq qoyanlar mütləq cəzalanmalıdır. Ancaq çox vaxt həkimlər uşağın ayını düzgün yazmırlar. Bu gün səhiyyə ilə bağlı bizim orqanlar var, onlar bu məsələlərlə məşğul olmalıdırlar. Dünyanın bir çox ölkəsində UZİ qadağandır. UZİ-nin hesabına demoqrafik disbalans yaranır. Bir qadına 2 kişi düşür. Amma bizdə belə deyil. Hesablamalara görə, 51 faiz oğlan, 49 faiz qız doğulur. 18 yaşında isə balans düzəlir və 70 yaşdan sonra isə qadınların sayı artır, kişilərin sayı isə azalır. Bu da bir qanunauyğunluqdur. Bu balansı pozanda isə təbiət bizi cəzalandırır. Bizi biseksualizm, eynicinslilər arasında nikahların bağlanması ilə cəzalandırır. Avropada niyə belə hallar baş verir? Çünki o balans pozulur, uşaqlar az doğulur. Qadınlar kişiləşir, kişilər qadın olur”.
