Tanınmış saytın keçirdiyi sorğu maraqlı nəticələr ortaya çıxarıb
Azərbaycanın indiki parlamentinin formalaşmasından bir il keçdi. 125 üzvü olan Milli Məclisin indiki tərkibinin formalaşmasının 1 illiyi münasibətilə mediaforum.az saytı “Ən çox bəyəndiyiniz deputat hansı partiyanı təmsil edir” sualı ilə internet sorğusu təşkil edib.
Dünən internet sorğusu yekunlaşıb. Ümumilikdə 281 dəfə səs verilmiş sorğuda nəticələr belə olub: Heç bir deputatı bəyənmirəm - 166 səs, Ümid Partiyası - 39, Yeni Azərbaycan Partiyası -23, Vətəndaş Həmrəyliyi Partiyası -22, Böyük Quruluş Partiyası -12, Bütöv Azərbaycan Xalq Cəbhəsi Partiyası -12, Ana Vətən Partiyası -3, Vətəndaş Birliyi Partiyası-2, Demokratik İslahatlar Partiyası -1, Ədalət Partiyası -1, Sosial Rifah Partiyası - 0. Səsvermədə iştirak etmiş hər bir şəxsə təşəkkürünü bildirən sayt xüsusi qeyd edir ki, internet sorğusunda sosioloji parametrləri gözləmək mümkün olmadığından və bir nəfərin bir neçə dəfə səs verməsinin qarşısını almaq üçün tətbiq edilən texniki məhdudiyyətlər şərti xarakter daşıdığından bu tipli sorğuların nəticələri həqiqi ictimai rəylə üst-üstə düşməyə bilər. Dünən sorğu başa çatdıqdan sonra oxucular redaksiyamıza zəng vurub maraqlı fikirlər söyləyiblər. Dedilər ki, sorğuda iştirak edən 281 nəfərdən 166-sının heç bir deputatı bəyənməməsi hazırkı parlamentə cəmiyyətin münasibətinin göstəricisidir. Parlamentdəki partiyalardan isə deputatı ən çox bəyənilən Ümid Partiyasıdır, o da cəmi 39 səslə. Parlamentdəki digər partiyalara isə cəmiyyətdə münasibət acınacaqlıdır. Sorğuda Vətəndaş Birliyi Partiyasına 2 səs verilib. Oxucular iddia edir ki, hər halda bu səs də partiyanın sədri deputat Sabir Hacıyevlə onun deputat köməkçisinə məxsusdur. Demokratik İslahatlar Partiyası ilə Ədalət Partiyasının hər birini 1 səs verilməsi isə həmin partiyalara hətta deputat sədrlərindən başqa heç kimin səs vermədiyini söyləməyə əsas verir. Deputat Xanhüseyn Kazımlının sədrlik etdiyi Sosial Rifah Partiyasına isə deyəsən, bu ölkədə heç Xanhüseyn müəllimin özü də inanmır.
