Milli Məclisin bu gün keçirilən plenar iclasında “Topaz” bukmeker kontorunun fəaliyyəti tənqid olunub.
APA-nın məlumatına görə, deputat Məlahət İbrahimqızı “Topaz”ın fəaliyyəti ilə bağlı ona müraciətlərin daxil olduğunu deyib.
O qeyd edib ki, təkcə Nəsimi rayonundan ona bununla bağlı 13 qadın müraciət edib: “Rayonlardan da müraciətlər olur. Guya ki, bu kontorlar gənclərin asudə vaxtlarını keçirmək üçün nəzərdə tutulub. Amma adamlar orada evlərini uduzur. Universitetlər də şikayət edirlər ki, tələbələri o kontorlardan yığmaq olmur“.
Deputat Fazil Mustafa isə deyib ki, adamların “Topaz”a getməməsi üçün sadəcə maarifləndirmə işləri aparmaq lazımdır. Spiker Oqtay Əsədov isə deyib ki, “Topaz” qumarxana deyil: “Bu, həm də idmanın inkişafına yönəlmiş bir məsələdir. Amma müraciətləri araşdırarıq”.
