Bu iddia ilə şagirdin dayısı Kərim Şərifov "Xəzər Xəbər"ə müraciət edib.
Elşad Yəhyayev adına 56 nömrəli tam orta məktəbdə təhsil alan Ramiz Quliyevin dayısı Kərim Şərifovun sözlərinə görə, məktəb rəhbərliyi şagirdi peşə təhsilinə yönləndirir. Bunu nə şagirdin özü, nə də ailəsi istəyir.
Məsələ ilə bağlı məktəbdən bildirildi ki, 9-cu sinifində təhsil alan Ramiz Quliyev həm məktəbdaxili, həm də mərkəzləşmiş buraxılış imtahanlarında aşağı nəticə göstərib. Şagird mümkün 300 baldan 46 bal toplayaraq hər üç fənn üzrə "iki", yəni "qeyri kafi” qiymət alıb. Bununla bağlı valideynlə bir neçə dəfə söhbət aparılıb, şagirdin təhsilini digər istiqamətdə davam etdirməsi tövsiyə olunub.
Qeyd edək ki, qanunvericiliyə uyğun olaraq 9 illik təhsil icbari xarakter daşıyır. Şagirdlər öz seçimlərinə əsasən, 9 illik təhsil səviyyəsini bitirib, sonra maraq və potensiallarına uyğun olaraq peşə təhsili və ya digər müəssisələrdə öz təhsillərini davam etdirə bilərlər. Bu baxımdan IX sinif buraxılış imtahanlarındakı nəticələrinə uyğun olaraq müvafiq şagirdlərin peşə təhsili müəssisələrinə yönləndirilməsi ilə bağlı valideynlərlə keçirilən görüşlər zamanı onlara müvafiq tövsiyələr verilir, uşaqların gələcəyinin düzgün dəyərləndirilməsi imkanları diqqətə çatdırılır.
