Məlum olduğu kimi, ötən gecə ABŞ və Böyük Britaniya orduları döyüş gəmisindən atılan "Tomahawk" raketləri və döyüş təyyarələrindən istifadə edərək kütləvi cavab zərbəsi çərçivəsində Yəməndə İranın dəstəklədiyi husilərin istifadə etdiyi ondan çox obyekti bombalayıblar.
Bu hadisədən dərhal sonra Rusiya BMT-dən təcili iclas keçirməyi tələb edib.
Hazırda dünyada haqqında ictimai müzakirələr gedən ABŞ-nin Husilərə qarşı İsraildə müharibə başlayandan bəri kommersiya gəmilərinə dron və raket hücumlarının davamlı kampaniyası səbəbilə ilk hərbi cavabıdır.
Bəs bu hücumların müqabilində nə baş verəcək? Yaxın Şərqdə daha bir münaqişə ocağı gözlənilirmi?
Sözügedən proseslə bağlı AZXEBER.COM-a açıqlama verən hərbi ekspert Ədalət Verdiyev söyləyib ki, Yəməndəki bu cür hadisələr yeni münaqişə ocağının yaranma ehtimalını yaradır:
"Yaxın Şərqdə artıq bir neçə münaqişə ocağı mövcuddur. Başqa bir münaqişə ocağının isə ABŞ, Böyük Britaniya və digər Avropa ölkələrinin koalisiya yaradaraq Yəməndə Husilərə aid obyektləri bu gecə bombalamasından sonra yaranma ehtimalı var. Raket zərbələrinə tuş gələn "Ənsərullah" qruplaşmasının mövqeləri kifayət qədər böyük itkilərə məruz qalıb. Hazırda ABŞ zərbələrinə fasilə verib. Görünən odur ki, dünən gecə baş verən hücumlar Yəmənə və Husilərə bir xəbərdarlıq atəşi idi. Yəni Qırmızı dənizdə Husilər daşınmalara mane olacaqları təqdirdə bu zərbələrin növbəti mərhələsi müşahidə olunacaq. Əgər bu qruplaşma fəaliyyətində korreksiyalara yol verib daşınmalara mane olmazlarsa, ola bilər ki, ABŞ da hücumları davam etdirməsin".
Hərbi ekspert Rusiyanın BMT-ni təcili iclas keçirməyə çağırması ilə bağlı da fikirlərini deyib. Ekspert hesab edir ki, Rusiyanın bu addımı formal xarakter daşıyır:
"Rusiyanın BMT-ni təcili iclas keçirməyə dəvət etməsi və sair proseslər hazırkı vəziyyətə ciddi bir təsir etməyəcək. Çünki Rusiyanın BMT-nin Təhlükəsizlik Şurasında dedikləri fikirlər ABŞ-nin boğazından keçmir, ABŞ-nin də dediyi Rusiyanın boğazından keçmir. Odur ki, bu iclas formal xarakter daşıyır. Orda hansısa bir konkret nəticə çıxacağı gözlənilmir.
İranın da proseslərə qarışması mümkündür. Bu ölkənin ABŞ və Böyük Britaniyaya qarşı fəaliyyətə keçməsi Üçüncü Dünya Müharibəsinin başlanması üçün münbit şərait yarada bilər".
Mikayıl Mirzəzadə
