Cənubi Koreyanın paytaxtı Seulda Nüvə Təhlükəsizliyi üzrə Beynəlxalq Sammitə son hazırlıqlar başa çatıb. 50-dən çox ölkənin liderlərinin iştirakı ilə martın 26-27-də baş tutacaq sammit üçün güclü təhlükəsizlik tədbirləri görülüb. Sammiti 1500-ə yaxın kütləvi-informasiya vasitəsi işıqlandıracaq.

Nüvə sammitində əsas müzakirələr 5 ölkənin - Cənubi Koreya, Çin, Rusiya, Yaponiya və Amerika Birləşmiş Ştatlarının liderləri arasında aparılacaq. Şimali Koreyanın aprelin ortalarında Yerin süni peykini buraxmaq planı Seulda nüvə sammitində əsas müzakirə mövzusu olacaq.

Sammitdən əvvəl Cənubi Koreyanın prezidenti Li Men Bak bildirib ki, Şimali Koreyanın Yerin süni peykini buraxmaq niyyəti təcili olaraq müzakirə edilməlidir və bu məsələdə 5 ölkənin ortaq mövqeyi artıq mövcuddur. Onun sözlərinə görə, bu mövqe Şimali Koreyanı öz niyyətindən əl çəkməyə razı salmaqdır.

Amerika Birləşmiş Ştatları isə Şimali Koreyanın Yerin süni peykinin buraxılmasını reallaşdıracağı təqdirdə, bu ölkə ilə bütün sazişlərdən, o cümlədən ərzaq yardımı sazişindən imtina edəcəyini bəyan edib. ABŞ prezidenti Barak Obama da nüvə təhlükəsizliyi üzrə beynəlxalq sammitdə iştirak etmək üçün Cənubi Koreyaya yola düşüb. Sabah isə Barak Obama Cənubi Koreya ilə Şimali Koreyanı ayıran demilitarizasiya zonasına baş çəkəcək. Barak Obamanın Seula səfəri ABŞ-la Şimali Koreya arasında münasibətlərin gərginləşməsi fonunda baş tutur.

Türkiyənin baş naziri Rəcəb Tayyib Ərdoğan da nüvə sammitində iştirak edəcək. Bu gün Seula gedən Ərdoğan sabah ABŞ prezidenti Barak Obama ilə təkbətək görüşəcək (anspress).