Bakı Ağır Cinayətlər Məhkəməsində Mənzil İnşaatı Dövlət Agentliyinin adından istifadə edərək dələduzluq törətməkdə təqsirləndirilən, Daxili İşlər Nazirliyinin polkovniki, "579 SSA" MMC-nin təsisçisi Eldar Salayev, şirkətin direktoru vəzifəsində işləyən Məhəmməd Qafarov, Ülviyyə Abdalova və Leyla İsmayılovaya hökm oxunub.
AZXEBER.COM Qafqazinfo-ya istinadən xəbər verir ki, hakim Əlövsət Abbasovun icraatında olan prosesdə məhkəmə kollegiyasının hökmü ilə Ü.Abdalova 7 il müddətinə azadlıqdan məhrum edilib. Onun 2017-ci il 21 iyul tarixində anadan olan qızının 14 yaşı tamam olana kimi hökmün icrası təxirə salınıb. Ü. Abdalova məhkəmə zalından azadlığa buraxılıb. Ü. Abdalova əvvəl də məhkum olunaraq 7 il 6 ay müddətinə azadlıqdan məhrum edilib və şərti cəza alaraq azadlığa çıxıbmış. Həmin hökmdən qalan cəzası də ödənilməyib.
Digər şəxslərə isə şərti cəza verilib və istintaq zamanı həbs edilmədikləri üçün sərbəst qalıblar.
Ü. Abdalova bu cinayət işində də məhkəmə gedişatında azadlıqda qalıb, sonuncu iclaslara gəlmədiyi üçün axtarışa verilərək həbs edilib.
Qeyd edək ki, dövlət ittihamçısı çıxışında Eldar Salayevin 6 il 6 ay, Məhəmməd Qafarovun 7 il, Leyla İsmayovanın 6 il və Ülviyyə Abdalovanın 7 il müddətinə azadlıqdan məhrum edilməsini və məhkəmə zalında həbs olunmalarını istəyib.
