Xəbər verdiyimiz kimi, AXCP-nin Masallı rayonunda keçirdiyi toplantı qalmaqalla başa çatıb.
Belə ki, görüşdə iştirak edən rayon sakinləri bunun müqabilində onlara pul vəd edildiyini, amma aldadıldıqlarını iddia ediblər. Sakinlərə tədbirdə iştirak üçün 15 manat vəd edilsə də, sonradan onlar aldadılıb. Masallı sakinlərinə deyiblər ki, onlara pulu Fuad Qəhrəmanlı verməli imiş: “Dedilər AXCP rəhbərlərindən biridir. Fuad Qəhrəmanlının pul verəcəyini çox gözləsək də o, bizimlə görüşmədi və maşına əyləşərək çıxıb getdi”.
AZXEBER.COM xəbər portalı məsələylə bağlı Masallı rayon icra hakimiyyətinin başçısının müavini Nəsir Muxtarlı ilə əlaqə saxlayıb. O deyib ki, icra hakimiyyəti məsələylə bağlı mətbuatdan məlumat əldə edib: "Biz də bu haqda məlumatı mətbuatdan oxumuşuq və hər hansı əlavə məlumata sahib deyilik. İcra hakimiyyəti sadəcə ona edilən müraciət əsasında tədbirin keçirilməsi üçün məkan ayırıb. Ümumilikdə, isə onu deyə bilərəm ki, insanları şirnikləndirici vasitələrlə bu cür tədbirlərə cəlb olunması yaxşı hal deyil. Bu həm də Masallıda siyasi qüvvələrlə bağlı reallığı ortaya qoyan faktdır.Nəsir Muxtarlı eyni zamanda müxalifətin Masallıda güclü olduğu və onlara təzyiqlər edildiyinə dair iddialara da cavab verib. O deyib ki, əgər toplantıda cəmi 35 nəfər iştirak edibsə, o zaman müxalifətin hansısa gücündən və təzyiqdən danışmaq gülüncdür.
