Hüquq müdafiəçisi Əhməd Şahidov nüfuzlu Al Jazeera English kanalına müsahibə verib və 8 Avqustda Ağ Evdə baş tutan Azərbaycan-Ermənistan sülh görüşünü müsbət addım kimi dəyərləndirib. O, həmçinin regiondakı demoqrafik və hüquqi məsələlərə dair mühüm fikirlərini Al Jazeera English kanalına açıqlayıb.
Aparıcının "Yüz minlərlə etnik erməni Qarabağa geri qayıdacaqmı?” sualına cavab olaraq, Əhməd Şahidov bildirib ki, Qarabağın etnik erməni əhalisinin sayı təxminən 40 mindir və Azərbaycan dövləti onların təhlükəsiz şəkildə qayıdışını təmin etməyə hazırdır. O vurğulayıb ki, ermənilər heç kim tərəfindən qovulmayıb, özləri könüllü şəkildə ərazini tərk ediblər. "Bugün də Xankəndidə bəzi erməni ailələri yaşayır,” – deyə hüquq müdafiəçisi əlavə edib.
Əhməd Şahidov həmçinin Qərbi Azərbaycanlıların, yəni Zəngəzur və ətraf ərazilərdən olan azərbaycanlıların öz evlərinə təhlükəsiz qayıdış məsələsinə toxunub. Onun sözlərinə görə, Qarabağa ermənilərin qayıdışı ilə azərbaycanlıların Zəngəzura qayıdışı eyni qaydada və ədalətli şəkildə həyata keçirilməlidir. "Sovet dövründən yüz minlərlə azərbaycanlı Zəngəzur və ətraf ərazilərdən qovulub. Bu insanlar dədə-baba torpaqlarına qayıtmaq haqqına malikdirlər,” – deyə Əhməd Şahidov bildirib.
