Əllərdə və ayaqlarda yaranan keyimə, iynəbatma və hissiyyatın azalması bir çox insanın gündəlik həyatda qarşılaşdığı problemlərdəndir. Uzun müddət eyni vəziyyətdə oturmaq, sinirlərin müvəqqəti sıxılması və qan dövranındakı dəyişikliklər bu narahatlığa səbəb ola bilər. Lakin keyimənin tez-tez təkrarlanması, uzun müddət davam etməsi və digər əlamətlərlə müşayiət olunması bəzi ciddi xəstəliklərin xəbərçisi ola bilər.
Bəs əllərdə və ayaqlarda keyimə hansı xəstəliklərin əlamətidir? Hansı hallarda bu simptom təhlükəli hesab olunur və həkimə müraciət etmək zərurəti yaranır?
AZXEBER.COM xəbər verir ki, mütəxəssislərin məlumatlarına görə, ətraflarda keyimə müxtəlif səbəblərdən yarana bilər. Bunlardan biri şəkərli diabetdir. Qanda şəkərin uzun müddət yüksək olması periferik sinirlərin zədələnməsinə səbəb ola bilər. Diabetik neyropatiya adlanan bu vəziyyət əsasən ayaqlarda yanma, iynəbatma, keyimə və hissiyyatın azalması ilə özünü göstərir.
Bundan başqa, B12 vitamini çatışmazlığı da sinir sisteminin fəaliyyətinə mənfi təsir göstərərək əl və ayaqlarda keyiməyə səbəb ola bilər. Xüsusilə uzun müddət davam edən vitamin çatışmazlığı zamanı tarazlığın pozulması, halsızlıq və yaddaşla bağlı çətinliklər də müşahidə oluna bilər.
Boyun və bel nahiyəsində fəqərəarası disk yırtıqları, eləcə də sinir köklərinin sıxılması keyimənin digər mümkün səbəblərindəndir. Boyun nahiyəsində sinir sıxılması qollara və barmaqlara, bel nahiyəsində yaranan problemlər isə ayaqlara yayılan keyimə, ağrı və zəifliklə müşayiət oluna bilər.
Əllərdə, xüsusilə baş, şəhadət və orta barmaqlarda gecələr artan keyimə karpal tunel sindromunun əlaməti ola bilər. Bu zaman bilək nahiyəsində sinirin sıxılması nəticəsində barmaqlarda hissiyyat dəyişiklikləri yaranır.
Bəzi hallarda keyimə dağınıq skleroz kimi mərkəzi sinir sistemi xəstəlikləri ilə də əlaqəli ola bilər. Bununla yanaşı, qalxanabənzər vəzinin fəaliyyətinin zəifləməsi, bəzi dərman preparatları və digər periferik sinir xəstəlikləri də bu simptomun yaranmasına səbəb ola bilər.
Həkimlər xüsusilə qəfil başlayan, bədənin yalnız bir tərəfində müşahidə olunan keyiməyə diqqət yetirilməsinin vacibliyini bildirirlər. Belə vəziyyət üzün əyilməsi, nitqin pozulması, görmə dəyişikliyi və ya qol-ayaqda zəifliklə müşayiət olunarsa, insult əlaməti ola bilər və dərhal təcili tibbi yardım çağırılmalıdır.
Əllərdə və ayaqlarda davamlı və ya təkrarlanan keyimə zamanı səbəbin müəyyənləşdirilməsi üçün həkim müayinəsi vacibdir. Diaqnozdan asılı olaraq qanda şəkər və B12 vitamini səviyyəsinin yoxlanılması, nevroloji müayinə və digər müayinələr tələb oluna bilər.
Mütəxəssislər vurğulayırlar ki, keyimə hər zaman ciddi xəstəliyin göstəricisi olmasa da, bu əlamətin davamlı şəkildə təkrarlanmasına laqeyd yanaşmaq olmaz.
Şahanə Ziyad
