Azərbaycan Sosial Demokrat Partiyasının sədri Araz Əlizadə əmindir ki, müxalifət yönümlü “Milli Şura” bu ilin payızında keçiriləcək prezident seçkilərində vahid namizəd kimi EL İctimai hərəkatının rəhbəri Eldar Namazovun namizədliyini irəli sürməyəcək.
Gün.Az-ın 1news.az-a istinadən verdiyi xəbərə əsasən, o, bu barədə EL İctimai hərəkatının rəhbəri Eldar Namazovun müxalif “Milli Şura”nın icra aparatının rəhbəri postuna təyin olunmasını şərh edərkən deyib.Əksər müşahidəçilərin fikrincə, bu təyinat, həmçinin “Milli Şura”nın rəhbəri Rüstəm İbrahimbəyovun bundan sonra “işgüzar aktivliyi” Eldar Namazova həvalə etməsi ilə bağlı açıqlaması bir daha göstərir ki, İbrahimbəyov “toy generalı” rolunu ifa edir. "Kukla oynadan" rolunda isə, xaricdəki müəyyən dairələrin səxavətlə maliyyələşdirdiyi Namazovdur.Ancaq Araz Əlizadə hesab edir ki, hətta bütün bunlar nəzərə alınsa belə, Eldar Namazov ciddi siyasi fəaliyyətə sahib olan nəhəng fiqur deyil.“O, həmişə əl altında işləyən adam olub. Onun karyerasının pik nöqtəsi Heydər Əliyev rəhbərliyində katiblik idi. Odur ki, onun bugünkü bacarığı elə “Milli Şura” kimi bir qurumun aparat rəhbəri olması ilə məhdudlaşır”, - deyə partiya sədri bildirib.
A.Əlizadənin fikrincə, E.Namazovun aparat rəhbəri kimi ilk işi ətrafına bu gün üçün aktual olmayan, “vurulmuş pilotlar”ı toplamaq olacaq – o bu üsula özünün rəhbərlik etdiyi EL İctimai hərəkatını yaradarkən də əl atmışdı.“EL Hərəkatındakılar dünən deyil, hətta “srağagünün adamları”dırlar. Bununla belə, Eldar Namazov hamını qorxudurdu ki, hər kəsi özünün kreativliyi ilə təəccübləndirəcək. Sən demə, müasir həyatın kreativliyi iş bacarığı olmayan təşkilatda toplanmış “srağagünün partokratları” imiş”, - deyə ASDP rəhbəri qeyd edib.Əlizadə hesab edir ki, Namazov hətta nəzəri olaraq da növbəti prezident seçkilərində hazırkı dövlət başçısına rəqib ola bilməz: "Bu, onluq deyil”.ASDP sədri, həmçinin, kinodramaturq Rüstəm İbrahimbəyovun siyasi meydandakı son hərəkətlərini təəssüflə qarşılayıb.
“O, illərdi min bir əziyyətlə qazandığı nüfuzunu mənasız incikliyə görə xərcləməkdədir”, - deyə A.Əlizadə bildirib.
Eldar Namazovun xaricdən maliyyələşdirilməsinə gəlincə, A.Əlizadə bunu istisna etməsə də, belə hallarda maliyyənin çatdırılma mexanizmindən məlumatsız olduğunu deyib.ASDP sədri bir daha vurğulayıb ki, EL hərəkatının rəhbəri Eldar Namazov prezident seçkilərində “Milli Şura”nın vahid namizədi kimi irəli sürülməyəcək.“Bu insanları illər boyu tanıdıqca başa düşürsən ki, bunların ambisiyaları ağıllarını üstələyir. Mənim fikrimcə, bu seçkilərdə müxalifətin vahid namizədi kim olur-olsun, qələbə qazana bilməyəcək. Mən buna qətiyyən şübhə etmirəm”, - deyə Əlizadə fikrini tamamlayıb.
