Prezidentliyə namizəd, “El” hərəkatının sədri Eldar Namazovun hələ də mətbuata açıqlanmayan Rusiya səfərinin bəzi təfərrüatları məlum olub.
Ölkəyə qayıtmasına baxmayaraq Rusiya səfəri ilə bağlı mətbuata açıqlama vermək istəməyən Eldar NamazovMoskvada kinodramaturq Rüstəm İbrahimbəyovla görüşüb.
AZXEBER.COM-un məlumatına görə, bu barədə “El” hərəkatının Ali Məclisinin sədri Eldəniz Quliyev “modern.az”a məlumat verib. Moskva səfərini başa vurmasına baxmayaraq, Eldar Namazovla hələ də görüşmədiklərini deyən E.Quliyev bəzi məsələlərdən xəbərsiz olduğunu deyib:
“Sözün açığı, mən Eldar müəllim səfərindən məlumatsızam. Bir onu bilirəm ki, Eldar Namazov Moskvada Rüstəm İbrahimbəyovla görüşüb. Mən də Eldar müəllimlə görüşmədiyim üçün dəqiq deyə bilmərəm söhbət nədən gedib. Onun üçün xəbərim yoxdur. Bu sıradan, adi bir görüş idi. Biz mütəmadi olaraq bir-birimizlə görüşürük. Rüstəm müəllim ağsaqqaldır, onunla Gürcüstanda və yaxud hər hansı bir ölkədə görüşməyimizə təbii baxmaq lazımdır”-deyə E.Quliyevvurğulayıb.
AZXEBER.COM portalı məsələ ilə bağlı digər bir prezidentliyə namizəd, Vətəndaş və İnkişaf Partiyasının (VİP) sədri Əli Əliyevin münasibətini öyrənib. Partiya sədri, Eldar Namazoun səfər haqqında mətbuata verdiyi açıqlamaları etibarlı saymadığını söyləyib:
“Bu şəxslər uzun müddətdir ki, siyasi layihə icra edirlər. Təbii ki, görüş zamanı həmin layihənin detallarının müzakirə olunması istisna deyil. Eldar Namazov səfər haqqında mətbuata məlumatlar verib. Amma bu məlumatları etibarlı saymaq olmaz”.
Ə.Əliyev bu görüşün ölkədəki ictimai-siyasi vəziyyəti qızışdırmaq kimi qiymətləndirməyin əlehinə olduğunu bildirib:
“Bu görüşləri ölkənin ictimai-siyasi vəziyyətini qızışdırmaq kimi qiymətləndirmək olmaz. Onlar prezidentliyə namizəddir və namizəd olaraq birlikdə görüş keçirib vəziyyəti analiz etmək istəyirlər”.
Partiya sədri eyni zamanda, Rüstəm İbrahimbəyov haqqında da danışıb. O, R.İbrahimbəyovun 1993-2009-cu illərdə hər zaman Azərbaycan hakimiyyətini dəstəklədiyini, ancaq son illər şəxsi maraqlarına görə hakimiyyət əlehinə çıxdığını bildirib:
“1993-cü ildən 2009-cu ilə qədər Rüstəm İbrahimbəyov hakimiyyətdən kifayət qədər razı olan şəxs olub. Onun qardaşı parlamentdə təmsil olunub. O vaxtları, Heydər Əliyev bu iki qardaşın şərəfinə Gülüstan sarayında tədbir keçirmişdi. Yəni hakimiyyətlə münasibətlər kifayət qədər müsbət səviyyədə olub. İndi baş verən ziddiyət şəxsi zəmində yaranan ziddiyyətdir. Bu ziddiyyəti siyasi durumla əlaqələndirmək düzgün deyil. Rüstəm İbrahimbəyov üçün şəxsi maraqlar daha yüksəkdə durur”.
Əfsələddin Ağalarov
