"Embawood” şirkəti dünən Bakının mərkəzində baş verən dəhşətli qəzanın görüntüsündən öz reklamı üçün istifadə edib.
AZXEBER.COM xəbər verir ki, şirkət Bakının Heydər Əliyev prospektində baş verən dəhşətli qəzadan foto paylaşıb və bu sözləri yazıb:
"Belə sürətlə, həm də təhlükəsiz – sifarişiniz ən qısa zamanda qapınızda!”.
Maraqlıdır ki, "Embawood” şirkəti qəzaya düşən "BYD” markalı taksiyə öz loqosunu yerləşdirib.
Bu azmış kimi həmin foto "Embawood”un "facebook” səhifəsində sponsorlu reklama da çıxarılıb.
Həmin posta gələn şərhlərdə isə mütləq əksəriyyət şirkəti kəskin tənqid edib.
Bu paylaşıma məşhurlar da biganə qalmayıb.
Xalq artisti Faiq Ağayev postun
şərhinə yazıb: "Embawood, çox ayıb”.
Tanınmış jurnalist Əzizə İsmayılova yazıb:
"Bu boyda şirkətsiniz, özünüzə yaraşdırdığınıza baxın. Bir insan faciəsi üzərindən özünüzü necə reklam edə bilərsiniz?
Heçmi sayğınız yoxdur şirkətinizin adına, rəhbərinə, imicinə?
Bunu düşünən, hazırlayan və paylaşılmasına OK verən əməkdaşlarınız bir gün sizə eyni faciəni daha qorxunc şəkildə yaşadacaqlar.
Bu cür zehniyyətlə eyni havanı udmaq qorxuncdur, o ki qala kimsə sizdən məhsul alıb məmnun qala”.
Rəhim Qarayev isə yazıb: "Mebellərin keyfiyyəti də yumorunuz kimidi?”
Qeyd edək ki, mövzu ilə bağlı sosial mediada xeyli status yazılıb və çoxluq şirkətin marketinq menecerini kəskin şəkildə tənqid edib.
