Yanvarın 12-də 5 saylı şəhər klinik xəstəxanasında 31 yaşlı Vüsalə Məmmədovanın əməliyyat zamanı ölümü ilə bağlı araşdırma aparılır.
Ölüm faktı ilə bağlı ekspertizalar təyin edilib və ekspertlərin rəyi əsasında fakta görə cinayət işi açıla bilər. Hazırda məsələ ilə bağlı Nərimanov prokurorluğunda araşdırmalar davam etdirilir.
V.Məmmədovanı əməliyyat edən cərrah Anar Mehdiyev Lent.az-a açıqlamasında bildirib ki, əməliyyatdan əvvəl bütün analizlər götürülüb: "Vüsalə Məmmədova qasıq yırtığının əməliyyatından əvvəl bütün analizləri verib. Onun arteriya damarlarında laxtalanma var idi və bununla bağlı da lazımı profilaktika da həyata keçirilmişdi. Əməliyyat özü də elə ağır əməliyyat deyildi, qısa zaman ərzində həyata keçirilən əməliyyat idi. Amma hələ də bizə qaranlıq olan səbəblərdən tromboemboliya baş verdi və trombların qalxması nəticəsində xəstənin ürəyində problem yarandı. Hər şey ildırım sürəti ilə baş verdi”.
Cərrah əlavə edib ki, əməliyyat zamanı hər hansı qanaxma baş verməyib və ölüm faktılnın səbəbi ekspertizanın rəyi nəticəsində dəqiqləşəcək
Qeyd edək ki. V.Məmmədovanın ailəsi onun həkim səhlənkarlığının qurbanı olduğunu bildirib. Mərhumun həyat yoldaşı deyib ki, həkim əməliyyat zamanı xəstənin damarını zədələyib. Hətta həkim hadisədən sonra mərhumun ailə üzvlərinə əməliyyat pulunu qaytararaq ''olur də belə şeylər'' deyərək gedib.
//Lent.az
