Türkiyə prezidenti Rəcəb Tayyib Ərdoğan Azərbaycan-Ermənistan təmas xəttində baş verən son hadisələrə münasibət bildirib.
Prezident jurnalistlərin suallarını cavablandırarkən Ermənistan prezidenti Serj Sarkisyanın Azərbaycanla müharibəyə hazır olduqlarına dair sözlərinə sərt reaksiya verib.
Türkiyə prezidenti Ermənistanın bu açıqlamalarla odla oynadığını qeyd edib.
“Ermənistan odla oynayır. Türkiyədə 100 minə yaxın erməni var. Bunlardan 50 mini Türkiyə vətəndaşı deyil. Lakin biz ölkədə yaşamaq icazəsi olmayanlara da tolerant davaranırıq. Yenə erməni vətəndaşlarımızın vəqf mallarını da təslim etdik. 24 aprel də də bir mesaj yayımladım. Biz xoş niyyətli olduğumuzu göstəririk”, - deyə Ərdoğan bildirib.
Ermənistanı qorxu bürüyüb
Türkiyə prezidenti Ermənistanın hər baxımdan Azərbaycandan çox geridə olduğunu, buna görə də ölkəni qorxu bürüdüyünü qeyd edib: “Qarşıdurma şəraitində Azərbaycan və İlham Əliyev güc qazanır. Rusiya da tam mənası ilə Ermənistana açıq dəstək verə bilmir. Çünki Azərbaycan ilə də mənfəət əlaqəsi var. Azərbaycanın geri aldığı yerlərlə bağlı “bizim üçün önəmli deyil” desələr də Ermənistanı qorxu bürüməyə başlayıb. Əhali, əsgər sayı və digər imkanlar baxımından Azərbaycanın gücü Ermənistanla müqayisə edilməyəcək qədər çoxdur. Azərbaycan ətrafındakı ölkələrə - nə Gürcüstan, nə də Ukraynaya bənzəmir. Rusiya Ukraynada belə istədiyi nəticəni əldə etmədi. Sadəcə Krımda tatarların sayı az olduğu üçün orada bir nəticə əldə edə bildi. Rusiya səhv edir”.
///AzNews.az
