Millət vəkili Çingiz Qənizadə: "Beynəlxalq aləmin qərar və qanunları olsaydı bu hal da olmazdı"
Tovuz rayonunun Əlibəyli kəndində Ermənistan Silahlı Qüvvələrinin açdığı snayper atəşi nəticəsində yaralanan 28 yaşlı Adil Musayevin vəziyyəti kafidir. Müalicə aldığı Tovuz Rayon Mərkəzi Xəstəxanasından verilən məlumata görə o müalicəsini hələ bir neçə gün də xəstəxanada alacaq. Ümumiyyətlə son vaxtlar, Ermənistan Silahlı Qüvvələri təmas xəttində daha da aktivləşib. Əlbəyli kəndində təmas xəttinə yaxın məsafədə yerləşən evlər üçün, o cümlədən Ağdamda da qoruyucu divarların tikilməsi bunun bir daha bariz nümunəsidir. Atəşkəs elan olunduğu bir dövrdə cəbhə xəttində davam edən döyüşlərdə mülki vətəndaşların əksəriyyətinin əsasən snayperlə vurulmasını millət vəkili Çingiz Qənizadə qarşı tərəfin münaqişəni sülh danışıqları ilə həllinə hələ də hazır olmamasının göstəricisi kimi qiymətləndirir. ATƏT-in təsir qüvvəsinin zəifləməsi də burda az rol oynamır.Millət vəkili, Çingiz Qənizadə: “Bunun arxasında da müəyyən qüvvələr durur. Rusiyanın təsiri altındadır və bu da görünür. Beynəlxalq aləmin qərar və qanunları olsaydı bu hal da olmazdı”.Atəşkəs rejimində cəbhə xəttinə bu tip silahların yerləşdirilməsi Cenevrə konvensiyasına zidd olmasına baxmayaraq prosesin davam etməsi regionda həm də təhlükəsizlik məsələsini şübhə altına alır. Xarici İşlər Nazirliyinin mətbuat xidmətinin rəhbəri Elman Abdullayev Ermənistan Silahlı Qüvvələrinin bu əməli təkrarlamasını Dağlıq Qarabağla bağlı status Kvonu uzatmağa yönələn hərbi siyasətinin bir hissəsi kimi dəyərləndirir.XİN mətbuat xidmətinin rəhbəri, Elman Abdullayev: “Mən də olan məlumata görə, atəşin baş verdiyi halda orda BMT-nin nümayəndələri də olub. Hətta onların orda mövcud olmasına belə göz yumulub. Bunu göstərir ki, münaqişə dondurulmuş münaqişə deyil. Və münaqişənin Avropa təşkilatları, Qərb təşkilatları tərəfindən dondurulmuş kimi adlandırılması adekvat deyil, yəni bu günün vəziyyətə müvafiq deyil. Çünki münaqişənin nə qədər təhlükəli olmasının canlı şahidiyik.Bunun təkcə biz yox, Avropa təşkilatlarıda şahididir”.Məlumat üçün deyək ki, təmas xəttindən snayperlərin çıxarılması məsələsi ilk dəfə 2010-cu ildə Azərbaycan və Ermənistan prezidentlərinin Həştərxan görüşündə gündəmə gəlib. Həmin görüş zamanı ümumi razılıq haqda qərar qəbul olunsa da buna əməl olunmayıb. Həmsədrlərin iştirakı ilə prezidentlərin 2011-ci ildə Soçi görüşündə də snayperlərin yığışdırılması barədə qərar qəbul olunmasına baxmayaraq görüşdən 3 gün sonra təmas xəttində 9 yaşlı azərbaycan sakini erməni snayperinin qurbanı oldu.
