Niderland-Belçika Azərbaycanlıları Koordinasiya Şurasının təşkilatçılığı ilə Niderland və Belçika Krallıqlarında yaşayan soydaşlarımız Qarabağda tarixi qələbəmiz və bundan sonra Azərbaycan diasporunun qarşısında duran vəzifələrlə bağlı virtual görüş təşkil edib.
Diasporla İş üzrə Dövlət Komitəsinin sədri Fuad Muradov 30 ilə yaxındır davam edən Ermənistan-Azərbaycan Dağlıq Qarabağ münaqişəsinin Azərbaycanın şanlı qələbəsi ilə başa çatması münasibətilə iştirakçıları təbrik edib və qeyd edib ki, rəşadətli ordumuzun şücaəti, Azərbaycan Prezidenti, Ali Baş Komandan İlham Əliyevin qətiyyəti ilə əldə olunmuş bu möhtəşəm qələbə bundan sonra dünya azərbaycanlılarının qarşısında Azərbaycanın milli maraq və mənafeyinin müdafiəsi üçün yeni vəzifələr qoyur.
"Azərbaycan diasporunun əvvəllər əsas vəzifələrindən biri ölkəmizin haqq səsini dünyaya çatdırmaq idisə, artıq hədəflərimiz və fəaliyyət istiqamətimiz dəyişir.
Bundan sonra Qarabağın zəngin mədəni irsinin dünyada təbliği, turizmin inkişafına yeni töhfə vermək fəaliyyətimizin prioritetini təşkil edəcək. Biz xarici ölkələrin KİV-lərini daha geniş məlumatlandırmalı, dövlətimizə dəstək olmalıyıq. Bu baxımdan, bizim görüşlərimiz daha intensiv olacaq”.
Görüşdə çıxış edən Niderland Parlamentinin deputatı Tunahan Kuzu da bu tarixi qələbə münasibətilə Azərbaycan xalqını təbrik edib.
Deputat diqqətə çatdırıb ki, Azərbaycanın haqlı mövqeyini müdafiə etdiyi üçün ermənilər onu təhdid etməyə başlayıblar:
"Lakin mən öz mövqeyimdən əl çəkməyəcəyəm. Bütün beynəlxaq ictimaiyyətin bildiyi kimi Qarabağ Azərbaycandır, bu gün Azərbaycan bayrağının Şuşa şəhərində və Ermənistanın işğalından azad edilmiş digər torpaqlarında dalğalandırılması qürurvericidir”.
Maisə Ağamirzəyeva, Aynur Məmmədova, Vüqar Abbasov, İlhan Aşkın, Ayhan Dəmirçi, Səbuhi Məmmədov, Firəngiz Bağırova, Elsevər Məmmədov və qələbə sevincini bölüşən digər soydaşlarımız bundan sonra da Azərbaycan dövlətinin yanında olduqlarını və milli maraqlarımızın müdafiəsi üçün yumruq kimi birləşəcəklərini bəyan ediblər.
37 soydaşımızın iştirak etdiyi görüşdə qələbənin qarşımızda qoyduğu yeni vəzifələrlə bağlı fikir mübadiləsi aparılıb, təkliflər səsləndirilib.
