Polşa Ermənistanla birgə hərbi təlimlər keçirməyi planlaşdırır. Bunu Polşa Müdafiə Nazirliyinin rəhbəri Vladislav Kosinyak-Kamış Varşavada erməni həmkarı Suren Papikyanla danışıqların yekunları üzrə bildirib.
Onun sözlərinə görə, tərəflər həmçinin hərbi ali təhsil müəssisələri arasında əməkdaşlığı və iki ölkənin müdafiə sənayesi arasında təcrübə mübadiləsini müzakirə ediblər.
Hərbi-ekspert Ədalət Verdiyev AZXEBER.COM-a açıqlamasında bildirib ki, sözügedən təlimlər Ermənistanla Rusiya arasındakı münasibətləri gərginləşdirmək məqsədi daşıyır:
"Son illərdə Rusiya ilə Ermənistan arasında münasibətlər kifayət qədər gərginləşib. Hazırda bir çox Avropa ölkələri, xüsusilə Fransa və Polşa, Rusiyanın Ermənistana təsirini azaltmaq üçün müxtəlif addımlar atırlar. Sözügedən təlimlər də məhz Ermənistanla Rusiya arasındakı münasibətləri daha da gərginləşdirmək məqsədi daşıyır.
Polşa ilə Rusiya arasında münasibətlərin nə qədər gərgin olduğu məlumdur. Belə bir şəraitdə Polşa hərbçilərinin Ermənistanla birlikdə Rusiya kontingentinin önündə təlim keçməsi mövcud münasibətləri daha da gərginləşdirə bilər”.
Ekspert qeyd edib ki, Ermənistan tarix boyu daim qlobal güclərin təsiri altında olub:
"Ermənistan tarix boyu daim qlobal güclərin təsiri altında olub. Hazırkı vəziyyətdə isə Ermənistanın Rusiya limanından ayrılıb Avropaya doğru yelkənsiz gəmi kimi istiqamətləndiyinin şahidi oluruq. Bu cür addımlar Ermənistanı Rusiya ilə Qərb arasında geosiyasi maraqların toqquşduğu məkana çevirə bilər. Necə ki, Suriya qlobal güclərin geosiyasi maraqları səbəbindən döyüş poliqonuna çevrilib, Ermənistan da bu siyasəti davam etdirsə, gələcəkdə Ukrayna və Suriyanın taleyini yaşamaq riski ilə üzləşə bilər”.
Şahanə Ziyad
