Bununla sakitləşməyən Ermənistan qüvvələri Kəlbəcər rayonu ərazisində yerləşən mövqelərimizə qarşı PUA zərbələri endirib.

 

Nəticədə daha 2 hərbçimiz yaralanıb.

 

Ordumuzun qətiyyətli cavabı nəticəsində iki erməni əsgər məhv edilib, biri yaralanıb.

 

Bəs sözügedən erməni təxribata növbəti müharibəyə işarə ola bilərmi?

 

Məsələ ilə bağlı AZXEBER.COM-a danışan Azərbaycan Silahlı Qüvvələrinin ehtiyatda olan polkovniki, hərbi ekspert Şair Ramaldanov bildirib ki, bu cür təxribatlar yeni müharibənin carçısı ola bilər:

 

"Hər bir təxribat müharibə anonsu ola bilər. İkinci Qarabağ Müharibəsindən sonra təxribatlar davam edir. Bu təxribatlar demək olar ki, Azərbaycanın Müzəffər Ali Baş Komandanı, cənab Prezident İlham Əliyevin əmriylə əks hücum əməliyyatı keçirtmək ilə nəticələndi. Nəticədə 44 günlük Vətən Müharibəsində Azərbaycan işğalçı qüvvələri qısa zamanda darmadağın edərək ərazi bütövlüyünü bərpa etdi. Bu gün də təxribatlar daimi ola bilər. Azərbaycanda Ordusu indi də düşmənin adekvat cavabını verir. Amma Azərbaycanın ərazisində gedən proseslər, yəni Dağlıq Qarabağ İqtisadi Zonasını nəzərə alsaq, burada təhlükə mənbəyi qalır. Azərbaycan dövlətinin vəzifəsi ondan ibarətdir ki, öz xalqının təhlükəsizliyini təmin etməlidir. Təbii ki, bununla bağlı hansısa addımlar atmalıdır. O ki qaldı şərti sərhəddə olan təxribatlara".

 

Hərbi ekspert hesab edir ki, bu tip təxribatların əsas səbəbi Azərbaycanla Ermənistan arasında sülh müqaviləsinin olmamasıdır:

 

"Əgər bu hərbi provokasiyalar yenə də davam edərsə, nəticədə şərti sərhədə yaxın olan yaşayış məntəqələri və dinc əhaliyə hər hansı bir təhlükə yaranarsa, Azərbaycan Ordusu orada müəyyən bir əməliyyat apararaq həmin istiqamətdə təhlükəsizliyi təmin edəcək. Buna görə də təxribatların miqyasından, məqsədindən asılı olaraq adekvat cavab tədbirləri görülür. Biz Ermənistanla müharibəni bitirməmişik. Sülh müqaviləsi yoxdur. Sadəcə atəşkəs rejimi var. Atəşkəs də sülh demək deyil. Bu səbəbdən də döyüşlər hər an qaçılmazdır, zəruri halda aktiv fazaya keçilə bilər".