Ermənistan hökumətinin qərarı ilə 2024-cü ilin yay hərbi xidmətə çağırış müddəti 15 gün - avqustun 15-dək uzadılıb. Müvafiq qərar iyulun 25-də Ermənistan hökumətinin iclasında qəbul edilib.
Ermənistanda hərbiçilərin vaxtından çox xidmətdə saxlanılması və hərbi xidmətə qəbul vaxtının uzadılması bəzi sualların yaranmasına səbəb olub. Bəs bu addımı atmaqda Ermənistanın məqsədi nədir?
Mövzu ilə bağlı AZXEBER.COM-a Ağ Partiya sözçüsü Cavanşir Abbaslı açıqlama verib.
O, öz açıqlamasında Ermənistanda hərbçilərin vaxtından əlavə hərbi xidmətdə olmasını və hərbi xidmətə qəbulun vaxtının uzadılmasını Ermənistanın hər hansı plan hazırlaya bilməsi ilə əlaqələndirib:
"Ermənistan dövləti son dövrlərdə xam xəyallara düşüb. İyulun 21-də Kəlbəcər mövqelərinin atəşə tutulması onu göstərdi ki, Ermənstanın baş naziri Nikol Paşinyan sülh sazişi imzalamaq fikrində deyil. O, erməni cəmiyyətinə imitasiya xarakterli addımlar atmaq istəyir. Xüsusilə o yaxşı bilir ki, Ermənistan daxilində bəzi xarici qüvvələr qarışıqlıq yaratmaq və Paşinyanı hakimiyyətdən devirmək niyyətindədirlər. Hər kəsə bəllidir ki, keşiş öz istədiyinə çatmayıb. Keşiş bu günlərdə açıqlama verib ki, sentyabrda yenidən Ermənistanda aksiyalar başlayacaq. Düşünürəm ki, Paşinyan bu tip addımlar atmaqla əslində öz hakimiyyətinin ömrünü uzatmağa çalışır.
Bir məsələni də xüsusi vurğulamaq istəyirəm ki, İyulun 21-də Kəlbəcər istiqamətində Azərbaycan mövqeləri atəşə tutulan zaman bir məlumat yayıldı ki, ABŞ Fransa və Avropa birliyinin hərbi müşavirlərinin iştirakı ilə bu atəş həyata keçirilib. Onlar bir növ atəşi müşahidə ediblər. Bu isə onu göstərir ki, Ermənistan bu məsələdə tək deyil. Hər zaman olduğu kimi, onun havadarları iş başındadır. Burada Azərbaycan üçün heç bir təhlükəli məqam yoxdur.
Azərbaycan Prezidentinin deyimi ilə desək, "Dəmir yumruq” yerindədir. Hər zaman düşmən bu "Dəmir yumruğu” başı üstündə hiss etməlidir. İstənilən halda Erməni hərbçilərinin hərbi xidmət müddətlərinin başa çatmasına baxmayaraq evlərinə buraxılmaması onu göstərir ki, Ermənistan hər hansı plan hazırlaya bilər. Azərbaycan tərəfi hər şeyə hazırlıqlı olmalıdır. Onsuz da hazırlıqlıyıq. Onu da qeyd etmək istəyirəm ki, burada Azərbaycan tərəfi üçün heç bir təhlükə yoxdur. Sadəcə bütün bu addımlar sırf sülh sazişinin ömrünü uzatmağa hesablanıb. Düşünürəm ki, hər şey diplomatik masada həll olunma mərhələsinə çatıb. Azərbaycan ordusu döyüş meydanında düşməni necə darmadağın etdisə, necə parlaq qələbə qazandısa, diplomatik masada da, öz parlaq qələbəsini davam etdirəcək. Nəticədə Azərbaycanın istədiyi şərtlər daxilində sülh sazişi imzalanacaq".
Oksana Orucova
