“Eurovision-2012” mahnı müsabiqəsinin hazırlığı ilə bağlı Cenevrədə keçirilən Məşvərət Qrupunun görüşündə Avropa Yayımları Birliyi (EBU) və ev sahibi olan yayımçı televiziya kanalı İctimai Teleradionun biletlərinin satışının cədvəlini açıqlayıblar. APA-nın müsabiqənin rəsmi internet saytına istinadən yaydığı xəbərə görə, görüşdə bəyan edilib ki, müsabiqənin yarımfinallar və final konsertlərinə biletlərin ilin axırından əvvəl satışa çıxarılması gözlənilmir. Bildirilir ki, “Eurovision-2012”in biletləri hotellərin sifarişi başlayandan sonra satışa çıxarılacaq. Bakının əksər hotel tutumu 2012-ci ilin may ayında “Eurovision”a gələcək minlərlə qonaqları qəbul etmək üçün saxlanılacaq. Müxtəlif hava yolları Bakıya və Bakıdan əlavə uçuşların həyata keçirilməsini nəzərdə tutur. Qeyd edək ki, oktyabrın 7-si və 8-də Cenevrədə Azərbaycanın ev sahibliyi edəcəyi 57-ci “Eurovision” yarışması ilə bağlı Məşvərət Qrupunun növbəti iclası keçirilib. Görüşdə Azərbaycanın müsabiqə üzrə məsul şəxs Adil Kərimli iştirak edib.