Evdə təmizlik işləri demək olar ki, hər gün görülən məişət işlərindəndir.
Döşəmənin silinməsi, süpürülməsi və müxtəlif təmizləyici vasitələrdən istifadə evin gigiyenasının qorunmasına kömək edir. Lakin bu işlərin uzun müddət və düzgün olmayan formada görülməsi insan sağlamlığına mənfi təsir göstərə bilər.
AZXEBER.COM xəbər verir ki, xüsusilə döşəmə silərkən uzun müddət əyilmiş vəziyyətdə qalmaq bel, çiyin, bilək və digər nahiyələrdə ağrı və əzələ gərginliyinə səbəb ola bilər. Araşdırmalarda döşəmə silmə zamanı təkrarlanan hərəkətlərin və düzgün olmayan bədən vəziyyətinin dayaq-hərəkət sistemi üçün risk yaratdığı müəyyən edilib.
Təmizlik işləri ilə bağlı daha yeni araşdırmalarda da süpürmə, döşəmə silmə və digər işlərin orta və yüksək səviyyədə erqonomik risk yarada bildiyi qeyd olunur. Mütəxəssislər düzgün iş pozası, fasilələr və uyğun təmizlik alətlərindən istifadəni tövsiyə edirlər.
Məsələnin digər tərəfi isə istifadə olunan təmizləyici vasitələrdir. Xüsusilə sprey formasında olan məhsulların tərkibindəki bəzi kimyəvi maddələr havaya yayıla və tənəffüs yollarına təsir göstərə bilər.
Daha əvvəl aparılmış geniş araşdırmalardan birində həftədə ən azı bir dəfə təmizləyici spreylərdən istifadə edən şəxslərdə astma ilə bağlı simptomların yaranması arasında əlaqə müəyyən edilib. Araşdırmada sprey məhsullarından daha tez-tez istifadə edildikcə riskin də artdığı müşahidə olunub.
Bu baxımdan, ev silərkən yalnız döşəmənin təmizliyinə deyil, istifadə olunan vasitələrin tərkibinə və otağın havalandırılmasına da diqqət etmək vacibdir. ABŞ Xəstəliklərə Nəzarət və Profilaktika Mərkəzləri də qapalı məkanda təmizlik və dezinfeksiya vasitələrindən istifadə zamanı yaxşı havalandırmanı, məhsulların üzərindəki təlimatlara əməl etməyi və müxtəlif kimyəvi vasitələri bir-biri ilə qarışdırmamağı tövsiyə edir.
Digər tərəfdən, evin təmiz saxlanılması özü sağlamlıq baxımından faydalıdır. Əksər hallarda sabun və su ilə adi təmizlik səthlərdəki mikrobların, çirkin və digər çöküntülərin aradan qaldırılması üçün kifayətdir. Hər vəziyyətdə güclü dezinfeksiyaedici vasitələrdən istifadə etmək zəruri deyil.
Fəridə Əsədzadə
