"20 il bundan əvvəl Bakıdakı həyət evimiz yandı. Yanğın zamanı əşyalarla birgə bir çox arxiv şəkillərimiz yandı. Yanğını oğru törətmişdi. Hadisə zamanı atamın bir çox arxiv şəkilləri yandı. Demək olarki, hamısı yandı”.
AZXEBER.COM OLAY-a istinadən xəbər verir ki, bu sözləri müğənni Mehin Hümbətova qonaq olduğu "Xəzər axşamı” verilişində deyib.
Sənətçi proqramda 20 il əvvəl talanıb daha sonra yandırılan evlərindən danışıb.
Hümbətova dəhşətli hadisəni bu sözlərlə xatırlayıb:
"Oğru evimizə girib, talamışdı. Daha sonra əllərinin izi qalmasın deyə evimizi yandırdı. Oğurluq zamanı evdə heç kim olmayıb. Evimizdə oğurluq edən şəxsi tutdular və 6 il həbs cəzası verdilər. Həmin şəxs bizim evimizi tikən ustanın fəhləsi imiş. Artıq bilirdi ki, nəyi necə açmaq lazımdır. Evimizdən anamın qızıllarını, xaricdən alınan bahalı kostyumlarını, çantalarını oğurlamışdı. Bütün qızıl dəstlər getdi. O şəxsi tutulanda qızılların bir neçəsi satıb, pul etmişdi. Oğurluq hadisəsi olanda mən uşaq idim. Oğru evimizə ikinci mərtəbənin eyvanının qapısını qırıb girmişdi. Hətta xatırlayıram ki, o oğurladığı anamın qızıllarının hansısa dəstinin hissəsini ağacın dibində bastırmışdı. Bunlar sonradan araşdırma zamanı üzə çıxdı. Qızılların bir hissəsi bizə qaytarıldı, bir hissəsini isə artıq satmışdı. Evimiz yananda biz rayonda tətildə idik”.
Mehin bildirib ki, mərhum atası Hümbətov Məhəddin Mədət oğlunun almalı olduğu polkovnik rütbəsini hazırda anası Xatirə xanım daşıyır:
"Bizə köhnə şəkillər lazım olanda xalalarıma müraciət edib, onlardan götürürük. Onlar bütün mənim çıxdığım efirləri izləyirlər və mənə dəstəkdirlər. Xalalarımın öz şəxsi arxivi var. Lazım olanda onlar öz albomlarından tapıb bizə göndərirlər. Atam o zamanlar polis kimi vuruşaraq şəhid olub. İndi atamın almalı olduğu rütbəni anam Xatirə xanım daşıyır. O polkovnik rütbəsini alıb”.
