“Əkrəm Əylislinin məlum romanından sonra onun Azərbaycanı tərk etməsi gözlənilən idi və mən burada təəcüblü bir şey görmürəm”.

Bu sözləri AZXEBER.COM-a açıqlamasında hüquq müdafiəçisi Eynulla Fətullayev “Ziyalılar Forumu”nun həmtəsisçisi, yazıçı Əkrəm Əylislinin Azərbaycanı tərk etməsi ilə bağlı yayılan məlumatlara aydınlıq gətirərkən belə deyib.

Xatırladaq ki, “Ziyalılar formunun” həmtəsisçisi, yazıçı Əkrəm Əylislinin Azərbaycanı tərk etdiyi və xaricə üz tutduğu ilə bağlı məlumatlar yayılıb. Yayılan informasiyalara aydınlıq gətirən yazıçının oğlu xəbəri təsdiq etsə də geniş şərh verməyə ehtiyyac duymayıb.

Hüquq müdafiəçisi Eynulla Fətullayev hesab edir ki, Əkrəm Əylislinin Azərbaycanı tərk etməkdən savayı yolu yox idi: “Etiraf etmək lazımdır ki, Dağlıq Qarabağ münaqişəsində uduzan tərəf Azərbaycandır. Torpaqlarımızın 1/5-ini işğal altında olduğu, bir milyondan artıq qaçqın və məcburi köçkünlərin öz doğma yurd-yuvalarından didərgin düşdüyü və Ermənistanın işğalçılıq siyasətindən əl çəkmədiyi bir şəraitdə təcavüzkar Ermənistanı mədh eləyən və azərbaycanlıları aşağılayan bir roman yazmaqla Əkram Əylisli ciddi səhvə yol vermişdi. Məhz elə bu səbəbdən də artıq bir neçə ay idi ki, ictimai qınaqla üz-üzə qalmışdı. Mənim onun ölkənin tərk etməsi ilə bağlı hər hansı məlumatım yoxdur. Əgər belə bir hadisə baş veribsə, mən buna təbii yanaşıram”.

Fatimə İbrahimova