Tacikistan hökumətinin rabitə xidməti ölkədə fəaliyyət göstərən internet provayderlərdən tələb edir ki, Facebook sosial şəbəkəsini blok etsinlər.
Ölkə ərazisində Facebook-un bu gündən etibarən qadağan edilməsi tələb olunurdu. Bununla bağlı ölkənin rabitə xidməti bütün internet provayderlərinə SMS göndərib. Lakin "Saturn-Online" və "Telecomm Technology" kimi nəhəng internet provayderləri, hələ ki, bu tələbi yerinə yetirməyiblər. Bu şirkətlər rəsmi məktubun olmadığını əsas gətirərək qadağanı tətbiq etməyibər.
Tacikistanın İnternet Provayderlər Assosiasiyasının sədri Asomuddin Atoev jurnalistlərə bildirib ki, rəsmi dairələrin belə bir göstəriş verməsi istehlakçı hüquqlarının pozulmasıdır. Belə olan halda ölkənin imici də aşağı düşür.
SocialBakers.com portalının hesablamalarına görə, hazırda Tacikistanda 41 min Facebook istifadəçisi var ki, bu da ümumi internet istifadəçilərinin 5,87%-dir.
Qeyd edək ki, bundan əvvəl də Tacikistanda Facebook qadağası qoyulmuşdu. Bu ilin mart ayının 2-dən 11-ə qədər qoyulan qadağadan sonra ölkə əhalisi arasında Facebook istifadəçilərinin sayı 20%-ə qədər artmışdı. (milli.az)
