Fatih Terim Çexiya milli komandasının baş məşqçi postuna namizədlərdən biri kimi göstərilir.
AZXEBER.COM xəbər verir ki, DÇ-2026-nın seçmə mərhələsinin L qrupunda çıxış edən Çexiya yığmasında rəhbərlik dəyişikliyi gündəmdədir.
Komandanın Səudiyyə Ərəbistanı ilə yoxlama görüşündə 1:1 hesablı heç-heçə etməsindən sonra İvan Haşekin vəzifəsini itirə biləcəyi irəli sürülüb.
Federasiya onun yerinə 72 yaşlı türk mütəxəssis Fatih Terimi namizədlər sırasına əlavə edib.
Təcrübəli çalışdırıcı son olaraq Səudiyyə Ərəbistanının "Əl-Şabab” klubunda fəaliyyət göstərib və 23 oyunda 12 qələbə, 4 heç-heçə, 7 məğlubiyyətlə yadda qalıb.
Qeyd edək ki, Çexiya millisi seçmə mərhələdə indiyədək 5 oyun keçirib, bunlardan 4-də qalib gəlib, 1 dəfə isə uduzub. 12 xalla qrup cədvəlində 2-ci sırada qərarlaşan komanda növbəti qarşılaşmasını oktyabrın 9-da, Praqada Xorvatiyaya qarşı keçirəcək.
Zəfər Hacılı
