"BMT-nin İnsan Hüquqları üzrə Ali Komissarı Volker Türkün BMT-nin İnsan Hüquqları Şurasında səsləndirdiyi fikirlər qərəzli və siyasi motivlidir. Onun Azərbaycan dövlətinə qarşı sərgilədiyi yanaşma beynəlxalq hüquq prinsiplərinə zidd olmaqla, bu qurumun obyektivliyinə və etibarlılığına ciddi zərbə vurur. Volker Türk açıq-aşkar selektiv və ikili standartlara əsaslanan mövqe nümayiş etdirir. Bu, təkcə Azərbaycan üçün deyil, ümumilikdə beynəlxalq hüquq sisteminin legitimliyi üçün təhlükəli presedent yaradır”.
Bu sözləri "İslahatçı Gənclər ” İctimai Birliyinin sədri, siyasi şərhçi Fərid Şahbazlı deyib.
Onun sözlərinə görə, Azərbaycan beynəlxalq hüququn aliliyinə və demokratik dəyərlərə sadiqdir: "Lakin biz görürük ki, bəzi beynəlxalq qurumlar bu prinsipləri məqsədli şəkildə manipulyasiya edərək siyasi təzyiq vasitəsinə çevirirlər. Volker Türkün bəyanatları bunun bariz nümunəsidir. Ali Komissarın suveren bir dövlətin məhkəmə-hüquq sisteminə müdaxilə etməyə çalışması onun mandatına və beynəlxalq hüququn əsas prinsiplərinə açıq hörmətsizlikdir. İnsan hüquqları heç bir dövlətin və ya beynəlxalq təşkilatın geosiyasi maraqlarına xidmət etməməlidir”.
F. Şahbazlı vurğulayıb ki, təəssüf ki, Volker Türk və rəhbərlik etdiyi qurum uzun illər Azərbaycan torpaqlarının Ermənistan tərəfindən işğal edilməsinə, 1 milyondan çox insanın etnik təmizləməyə məruz qalmasına, dini və mədəni abidələrin dağıdılmasına, mina terroruna və 4 minə yaxın azərbaycanlının itkin düşməsinə göz yumub. Bu cür faktları görməzdən gələn bir şəxsin obyektivlik iddiası gülüncdür: "Ali Komissar əgər insan hüquqlarını müdafiə edirsə, ilk növbədə Ermənistanın törətdiyi bu ağır cinayətləri pisləməli, itkin düşən azərbaycanlıların taleyinin müəyyənləşdirilməsi üçün real addımlar atmalıdır”.
