3-6 oktyabr tarixlərində Belçikanın paytaxtı Brüsel şəhərində FİATA (Beynəlxalq Ekspeditorlar Assosiasiyaları Federasiyası) nın "Logistikanın dəyişən iqlimi” sloqanı ilə növbəti FİATA Dünya Konqresi keçirilib.
AZXEBER.COM xəbər verir ki, 70 ə yaxın ölkədən 500 dən çox iştirakçının və 60 dan çox bu sahədə ixtisaslaşmış beynəlxalq ekspert-çıxışçının iştirak etdiyi konqresdə Azərbaycanı Azərbaycan Nəqliyyat Ekspeditor şirkətləri Assosiasiyası, eləcə də ölkənin nəqliyyat-logistika sahəsində kadr hazırlığı üzrə ilk özəl təlim-tədris mərkəzi olan Aztugem MMC təmsil etmişdir.
Aztugem Təlim-Tədris müəssisəsinin rəhbəri, eyni zamanda beynəlxalq təşkilat olan WILAT (Women In Logistics And Transport) ın Azərbaycan üzrə əlaqələndirici məsul şəxsi təyin olunmuş Lamiyə Xəlilova konqres çərçivəsində bir çox assosasiya nümayəndələri və ekspertlərlə, eləcə də FİATA Prezidenti cənab İvan Petrov, həmçinin Ərəb Körfəzinin Baş Milli Ekspeditorlar Assosiasiyası sədri, eyni zamanda da WILAT Global ın vitse-prezidenti xanım Nadia Abdul Aziz ilə görüşlər keçirmiş, görüşlər çərçivəsində təcrübə mübadiləsi, kadr hazırlığı, təlim-tədris, qadınların nəqliyyat-logistikada mövqeyinin artırılması üzrə fikir mübadilələri aparmışdır.
3 gün davam edən FİATA Dünya Konqresi Proqramı "Logistika və nəqliyyat sahəsində yeni rəqəmsallaşma (digitalizasiya) həlləri”, "Yaşıl Logistikanın gələcəyi”, "Nəqliyyat və Logistika sahəsində risklərin idarə edilməsinin optimallaşdırma mənbələri”, "Nəqliyyat və Logistika üzrə peşə təhsilinin təşviqi” kimi panel mövzuları üzrə ekspertlərin təqdimatları, fikir mübadilələri və müzakirələrlə davam etmişdir.
Qeyd edək ki, 1926 – cı ildən fəaliyyət göstərən və mərkəz ofisi Cenevrə, İsveçrədə yerləşən Beynəlxalq Ekspeditorlar Assosiasiyaları Federasiyası (FİATA) hal-hazırda 150-dən çox ölkədən olan 109 Ekspeditorlar Assosiasiyalarını, eləcə də 5500 dən çox fərdi üzvi və 40 000 dən çox Nəqliyyat və Ekspeditor şirkətlərini birləşdirir.
