"Fransanın Ermənistanı silahlandırması ilk belə hadisə deyil. Verilən silahların təyinatından asılı olmayaraq məqsəd birdir və dəyişməzdir. Rəsmi Paris İrəvanı silahlandıraraq faktiki olaraq regionda davam edən sülh və delimitasiya prosesini zədələmək və pozmaq istəyir".
Bu fikirləri AZXEBER.COM-a açıqlamasında politoloq Turan Rzayev Fransanın növbəti dəfə Ermənistanı silahlandırmasından danışarkən deyib.
Siyasi ekspert bildirib ki, Fransa Cənubi Qafqazdakı prosesləri qarışdırıb Azərbaycanı qıcıqlandırmaq istəyir:
"Fransa yaxşı bilir ki, Cənubi Qafqazdakı vəziyyət olduqca həssasdır və hər an dəyişməyə uyğundur. Bu baxımdan da Paris mümkün dərəcədə prosesləri qarışdırıb rəsmi Bakını qıcıqlandıracaq addımlar atır. Nəticə etibarilə də bununla da gərginliyi artırmağı hədəfləyir. Təbii ki, proseslərin pərdəarxası məqamlarına baxdıqda Fransanın regionda gərginliyi artırmasından əlavə həm də burada Azərbaycana qarşı da verilən konkret bir mesaj var. Bu, Azərbaycanın mövqeyi deyil.
Bakı Təşəbbüs Qrupunun fəaliyyətləri, xüsusən də Fransanın dəniz aşırım torpaqları olan Yeni Kaledoniya və s. ərazilər, burada yaşayan xalqların haqq səsinə dəstək verilməsi görünür rəsmi Parisi ciddi şəkildə narahat edib. Fransa vaxtiylə attığı addımları özünə qarşı atıldığını görəndə belə təəccüblə yanaşır. Bundan əlavə, xatırlayırsınızsa, Cənubi Qafqazda Fransa agenturasına qarşı DTX tərəfindən çox ciddi bir əməliyyat keçirilmişdi. Bu əməliyyatın da təsirləri hələ unudulmayıb. Bütün bu nüansları götürsək, deyə bilərik ki, Fransanın Azərbaycana qarşı bir quyruq acısı var və özü birbaşa nəsə deyə bilmədiyi üçün Ermənistanı silahlandıraraq bu ölkə üzərindən gərginliyi artırmağa çalışır.
Siyasi şərhçi hesab edir ki, Azərbaycan indiyədək kifayət qədər Fransaya lazımi cavablar verib:
"Hesab edirəm ki, Azərbaycan onsuz da Fransaya qarşı kifayət qədər mühüm addımlar atıb. Dediyim kimi, Fransa agenturasının ölkəmizdə çökdürülməsi, bundan savayı, Yeni Kaledoniya və digər müstəmləkə ərazilərinə dəstəyin ifadə edilməsi, habelə ATƏT-in Minsk qrupu kimi köhnəlmiş "qurum"un prosesdən kənarda saxlanılması, Brüssel görüşləri çərçivəsində Fransanın iştirak etməməsini şərt qoşmaq kimi məsələlər olduqca effektiv cavablar idi. Amma indiki məqamda yeni hansı addımlar ata bilərik? Rəsmi Bakı Fransanı "Total" şirkətiylə təhdid edə bilər. "Total" şirkət nə qədər siyasi proseslərdən uzaq olduqlarını bildirsələr də reallıq ondan ibarətdir ki, bu şirkətlər Fransanındır və ölkəyə milyardlarla dollar qazandırır. Ona görə də bu şirkət üzərindən hərəkət etmək daha ağlabatan fikirdir".
Mikayıl Mirzəzadə
