"Azərbaycan beynəlxalq tədbirlərə uzun illərdir uğurla ev sahibliyi edir”.
Bu sözləri AZXEBER.COM-a açıqlamasında Milli Məclisin deputatı Naqif Həmzəyev III MDB Oyunlarından danışarkən deyib.
O bildirib ki, Azərbaycan idmançıları ən mötəbər yarışlarda bayrağımızı yüksəklərə qaldıraraq ölkəmizin idman ölkəsi olduğunu sübuta yetiriblər:
"MDB məkanında da Azərbaycan idmançılarının böyük nüfuzu var. Bununla yanaşı, Gəncə şəhəri MDB-nin idman paytaxtı seçilib. Qeyd edim ki, Gəncə 2012-ci ildə "Azərbaycanın Gənclər paytaxtı”, 2016-cı ildə "Avropa Gənclər paytaxtı”, 2019-cu ildə isə "Avropanın idman paytaxtı” seçilib. Bir sözlə, Azərbaycanın ikinci böyük şəhəri olan Gəncənin bu cür beynəlxalq statuslar qazanması əbəs yerə deyil. MDB oyunlarının Gəncə mərkəz olmaqla əlavə 7 rayon və şəhərdə keçirilməsi də xüsusi əhəmiyyət daşıyır. Bu, paytaxtdan kənarda təşkil olunan ilk böyük beynəlxalq tədbirdir. Həm də Azərbaycanın regionlarında idman infrastrukturunun yüksək səviyyədə olmasının göstəricisidir”.
Deputat vurğulayıb ki, regionlarda bu cür mötəbər yarışların keçirilməsi həmin ərazilərin turizm potensialının artmasına xidmət edir:
"Dünən Gəncədə MDB oyunlarının açılış mərasimi baş tutdu. Azərbaycan Prezidenti İlham Əliyev və birinci vitse-prezident Mehriban Əliyeva da bu mərasimdə iştirak etdilər. Biz fəxr edirik ki, açılış zamanı Azərbaycan mədəniyyəti və dövlətçilik tarixi ən yüksək səviyyədə nümayiş etdirildi. Xüsusilə də 44 günlük Vətən müharibəsindəki Zəfərimizi və "Dəmir yumruq” rəmzini əks etdirən səhnələr tamaşaçılarda böyük təəssürat yaratdı. Mərasimin sonunda isə Gəncədən sülh rəmzi olan göyərçinlərin havaya buraxılması ilə dünyaya sülh mesajı verildi”.
Parlamentari qeyd edib ki, MDB oyunlarının Gəncədə keçirilməsi həm də şəhərin inkişafı üçün böyük imkanlar yaratdı:
"Bu çərçivədə Gəncə stadionu istifadəyə verildi, yol infrastrukturu və ictimai nəqliyyat yeniləndi, böyük avtobus qarajı tikildi. Şəhərin dəmir yolu vağzalı əsaslı şəkildə yeniləndi, qatar reyslərinin sayı artırıldı, beynəlxalq havalimanının fəaliyyəti gücləndirildi. Bir sözlə, qərb bölgəsinin mərkəzi şəhəri olan Gəncə günü-gündən inkişaf edir. Dövlətimizin, xüsusilə də Prezident İlham Əliyevin şəhərə göstərdiyi diqqət və qayğı nəticəsində Gəncə bu gün mötəbər beynəlxalq tədbirlərə ev sahibliyi edən mərkəzə çevrilib. İnanırıq ki, gələcəkdə də bu təcrübə nəzərə alınaraq Gəncə və Azərbaycanın digər bölgələrində böyük idman və beynəlxalq tədbirlər keçiriləcək”.
Şahanə Ziyad
