Gənclər arasında psixoloji problemlər getdikcə yayılır. Gənclər arasında ən çox stress, panik atak və depressiya halları artır.
Ekspertlər xəbərdarlıq edir ki, vaxtında müdaxilə edilməzsə, bu hallar gənclərin həyat keyfiyyətinə ciddi təsir göstərə bilər.
Psixoloq-konsultant Zeynəb Əyyubova AZXEBER.COM-a deyib ki, gənclər arasında stress, panik atak və depressiyanın yayılması psixoloqlar və mütəxəssislər üçün ciddi narahatlıq doğurur:
"Bu tendensiyanın bir neçə əsas səbəbi var. Birincisi sosial və akademik təzyiqlərdir. Gənclər həm təhsil, həm də karyera planları ilə bağlı yüksək gözləntilərlə üz-üzədirlər. Bu təzyiqlər onların psixoloji gərginliyini artırır.
Eyni zamanda informasiya yükü və sosial şəbəkələr də bura daxildir. Sosial mediada davamlı müqayisələr, ideal həyat obrazlarının təqdim olunması və informasiyanın həddindən artıq çoxluğu özünüqiymətləndirməni azaldır, narahatlıq və panik hisslərini gücləndirir. Ailə və sosial dəstəyin zəifləməsi də sözügedən problemləri formalaşdırır. Ailələrdə emosional ünsiyyətin zəifləməsi, yaxın dost münasibətlərinin azalması gənclərin özünü tənha hiss etməsinə səbəb olur”.
Ekspert bildirib ki, maddi və gələcəyə dair qeyri-müəyyənlik də əsas səbəblərdəndir:
"İşsizlik, iqtisadi çətinliklər və gələcəkdəki sabitliyə inamsızlıq depressiv əhval-ruhiyyəni dərinləşdirir. Həmçinin psixoloji maarifləndirmənin azlığı da bu faktorlara daxildir. Gənclər hələ də stressin, panik atakın və depressiyanın nə olduğunu, bununla necə mübarizə aparmağı tam bilmir, bu da vəziyyəti ağırlaşdırır”.
Psixoloq vurğulayıb ki, bu səbəblərin hər biri təkcə fərdin deyil, cəmiyyətin də diqqətini tələb edir:
"Gənclərə psixoloji dəstək, stresslə mübarizə bacarıqları, sağlam ünsiyyət və emosional dayanıqlılıq mövzusunda maarifləndirmə çox vacibdir”.
Şahanə Ziyad
