Gəncə şəhəri Abbas Səhhət adına 1 saylı Şəhər Xəstəxananın Ginekologiya şöbəsinin müdiri Məhəbbət Məmmədova açıqlamasında bildirib ki, 1982-ci il təvəllüdlü Aynur Oqtay qızı Kərimova iki aylıq hamilə olub. Onun sözlərinə görə, hamilə qadın xəstəxanaya tam huşsuz, təzyiq "0" vəziyyətində gətirilib.

"Qadın haqqında məlumatları ancaq yaxınları veriblər. Məlum olub ki, Aynur Oqtay qızı Kərimova 5 gün əvvəl hamilə olub-olmadığını öyrənmək üçün Dəmiryol Xəstəxanasına müraciət edib. Orada baxılıb və bildirilib ki, uşaqlıq boşdur. Evə getdikdən sonra vəziyyəti pisləşsə də, həyat yoldaşı həkimə aparmayıb və bildirib ki, "həkimdən çox bilməyəcəksən ki, hamilə deyilsən". Sonda baldızı onu başqa xəstəxanaya aparmağı məsləhət bilib. 5 gündən sonra bizə gətiriləndə vəziyyəti çox pis idi. Qəbuldan birbaşa reanimasiyaya qaldırılıb. Ürəyi dayanmışdı, masaj və iynələrlə özünə gətirilib əməliyyat etdik".

M.Məmmədovanın sözlərinə görə, hamilə qadın 3 litr qan itirib: "Biz ona qan köçürtdük, əməliyyat etdik, amma sonra onu ayıltmaq mümkün olmadı. Onun iki azyaşlı körpəsi var".

Faktla bağlı Gəncə Şəhər Prokuroluğunda araşdırma aparılır.

///AzVision.az