Oktyabrın 6-sı Qubada 60 yaşlı kişi, bu gün isə Sumqayıtda 32 yaşlı kişi, Tovuzda 57 yaşlı qadın dəm qazından boğularaq ölüblər.
AZXEBER.COM Xezerxeber.az-a istindən xəbər verir ki, üzü qışa doğru belə faciəvi xəbərlərin də sayı artır. Əksər ölümlər hamam otağında baş verir.
Təhlükəsizlik eksperti Elmar Nurəliyev deyir ki, dəm qazı yanma prosesi düzgün getmədikdə yaranır. Standartlara uyğun olmayan cihazlar quraşdırıldıqda, cihazlara kənar müdaxilələr edildikdə, həmin otaqda havalandırma olmadıqda problem yaşanır. Burada əsas diqqət edilməli olan isə həm də tüstü bacalarıdır.
Bəzi insanlar evini qızdırmaq üçün də kustar üsulla hazırlanmış, tələblərə cavab verməyən sobalardan istifadə edirlər. Fövqəladə Hallar Nazirliyi belə şəxsləri diqqətli olmağa çağırır.
Dəm qazından zəhərlənən insanlarda baş ağrısı, baş gicəllənməsi, ürəkbulanma və halsızlıq əlamətləri olur. Zəhərlənmə baş verərsə, həmin şəxsi dərhal havaya çıxartmaq, nəfəs almasını çətinləşdirən geyimlərdən azad etmək və dərhal təcili tibbi yardım çağırmaq lazımdır.
