KIVDF, Milli Televiziya və Radio Şurası və Azərbaycan Mətbuat Şurası tərəfindən Ümumdünya Mətbuat Azadlığı Gününə həsr olunmuş seminar çərçivəsində cümə axşamı "Azərbaycan media məkanı: mövcud durum və perspektiv vəzifələr" mövzusunda tədbir keçirilir. Trend-in məlumatına görə, Azərbaycan Mətbuat Şurasının sədriƏflatun Amaşovtədbirin açılışında Ümumdünya Mətbuat Azadlığı Gününün tarixi barədə məlumat verib. O qeyd edib ki, BMT dünyada mətbuat azadlığı ilə bağlı verdiyi bəyanatlarda qeyd edir ki, hökumət məlumat azadlığına məhdudiyyət qoymamalıdır. Azərbaycanda azad mətbuatın mövcudluğu barədə danışan Amaşov qeyd edib ki, bu gün ölkədə baş verən bütün hadisələr ictimaiyyətə çatdırılır və buna heç bir məhdudiyyət qoyulmur. O, həmçinin qeyd edib ki, Azərbaycanda bu gün vətəndaşların ideya və fikirlərinin də ictimaiyyətə çatdırılmasında heç bir məhdudiyyət yoxdur. Azərbaycan Prezidenti Administrasiyasının İctimai-siyasi məsələlər şöbəsinin müdiriƏli Həsənovtədbirdə bildirib ki, Azərbaycanda 20 illik müstəqillik illərində bir neçə sahədə inkişafın bünövrəsi qoyulub ki, bunlardan biri də cəmiyyətdə informasiya azadlığının təminatıdır. Azərbaycanda media azadlığının təminatı barədə danışan Əli Həsənov bildirib ki, ölkədə senzuranın ümummilli lider Heydər Əliyev tərəfindən ləğv olunması Azərbaycan mediasının gələcək inkişafının əsasını qoyub. "Senzura "buzu" əriyəndən sonra mətbuatla cəmiyyət üz-üzə qaldı. Mediada hər kəs savadlı, etik normalara uyğun jurnalist deyil və bununla bağlı bir çox məhkəmə çəkişmələri oldu. Getdikcə bu məsələlər öz axarına düşdü. Azərbaycan hakimiyyətinin iradəsində azad media, söz azadlığını formalaşdırmaq durub. Azərbaycanda heç bir jurnalist deyə bilməz ki, istədiyi hadisə barədə məlumat yığıb, onu yaymaqda qadağalar qoyulub. Bütün şəxslər jurnalist fəaliyyəti ilə məşğul ola bilərlər, onlara məhdudiyyətlər qoyanlar qarşılarında dövləti görəcəklər", - Həsənov deyib. PA şöbə müdiri media qarşısında duran vəzifələrdən də danışıb. "Media siyasiləşmə tendensiyasından qurtulmalıdır. Hazırda iqtidar, müxalif, müstəqil və reket media fəaliyyət göstərir. Azərbaycan hakimiyyətinin də əsas məqsədi medianı normal fəaliyyət istiqamətinə yönəltməkdir", - Həsənov bildirib. PA rəsmisi vəzifələrdən biri kimi jurnalist peşəkarlığının artırılmasını qeyd edib. "Diffamasiya mühiti indikindən qat-qat artıq ictimai normalara riayət etməsini tələb edir. Ya media mühiti bu məsələlərdə diqqətli olmalıdır, ya da biz diffamasiya mühiti yarada bilməyəcəyik. Bəlkə də bunun üçün müvafiq kurslar açılmalıdır", - Həsənov vurğulayıb. Həsənov mediada olan reket jurnalistikadan, öz fəaliyyətini təhdid üzərində quran jurnalistlərdən xilas olmağın vacibliyini də vurğulayıb. PA şöbə müdiri medianın maddi-texniki bazasının yaxşılaşdırılması məsələsinə toxunaraq Azərbaycanda dövlət tərəfindən mediaya göstərilən yardımın şəffaflaşdırılması ilə bağlı məsələni də qeyd edib. "Mən sizə söz verirəm, jurnalistlər üçün tikilən evlərin paylanması da tam şəffaf keçiriləcək və yalnız layiq olan jurnalistlərə təqdim olunacaq. Seçim 3 prinsip əsasında aparılacaq. Bunlar Azərbaycanda xidməti, haqqı, ehtiyacı olan jurnalistlər olacaq", - o deyib.