“Ölkəmiz bütün beynəlxalq qurumlarla əməkdaşlıq edir və əməkdaşlığa davam etməlidir”.
Bu sözləri AZXEBER.COM-a açıqlamasında millət vəkili, Azərbaycan Demokratik İslahatlar Partiyasının sədri Asim Mollazadə söyləyib. Millət vəkili deputat həmkarı Elman Məmmədovun Azərbaycanda fəaliyyət göstərən beynəlxalq institutların bağlanması ilə bağlı açıqlamasının yanlış olduğunu bildirib:
“Mən düşünürəm ki, heç bir beynəlxalq təşkilat və ya institutun Azərbaycanda bağlanmasına ehtiyac yoxdur. Azərbaycan bütün beynəlxalq qurumlarla əməkdaşlıq edir və mən hansısa bir fakt görmürəm ki, beynəlxalq institutların Azərbaycanda dövlət çevrilişi hazırlamasını isbatlasın. Mənə elə gəlir ki, bu cür yanaşma düzgün deyil. Ölkəmiz bütün beynəlxalq qurumlarla əməkdaşlıq edir və əməkdaşlığa davam etməlidir. Əgər hansısa iddialar varsa, bunlar araşdırılmalı və müzakirə edilməlidir. Yoxsa hansısa şübhələrlə beynəlxalq təşkilatların və institutların Azərbaycanda fəaliyyətinin dayandırılmasını düzgün hesab etmirəm”.
Xatırladaq ki, Milli Məclisin Dağlıq Qarabağdan seçilmiş deputatı Elman MəmmədovPublika.Az portalına verdiyi açıqlamada ABŞ-ın Milli Demokratiya İnstitutu Azərbaycana və digər fəaliyyət göstərdiyi ölkələrə kütləvi iğtişaşlar, dövlətə qarşı təxribatlar törətmək və pozuculuq fəaliyyəti göstərmək məqsədilə gəldiyini söyləmişdi. E.Məmmədov ABŞ-ın Milli Demokratiya İnstitutu, ATƏT-in Bakı ofisi və Avropa İttifaqına daxil olan bəzi dövlətlərin Azərbaycandakı nümayəndəliklərinin bağlanılmasının vacibliyini bildirmişdi.
Ceyhun
