Paytaxtın bir sıra rayonlarında zibil konteynerləri çatışmazlığı yaşanır.

 

Zibilyeşikləri tullantılarla dolub daşır. Buna görə də, zibillər hara gəldi - yaşayış evlərinin arasına, yol kənarına və ya həyətlərə tullanılır. Nəticədə tullantılar ətrafa səpələnir.

 

Tullantının yaratdığı xoşəgəlməz mənzərə, dəhşətli iy zibil qutullarına hələ 20 metr məsafə qalmış ürək bulandırır. Bu cür mənzərələrə paytaxtın bir çox yerində rast gəlmək mümkündür.

 

Baku Tv-nin əməkdaşları elə mənzərəyə sahib olan Yasamal rayonu 7-ci Salaxanı küçəsində olublar.

 

Sakinlər deyir ki, zibil qutusunun yanından keçə bilmək üçün uzaqdan bir dəfə dərindən nəfəs alırlar. Beləliklə, yaxına çatanda burnunu bağlayıb keçə bilmək üçün şərait hazırlanır.

 

Salamat Əhmədov – Sakin: "Buranın sakiniyəm. Artıq dərəcədə xahiş. Edirəm ki, bu zibillər üçün bir tədbir görülsün”. İradları nəzərə alaraq, məsələ ilə bağlı Yasamal rayon Mənzil-Kommunal Təsərrüfatı Birliyi ilə əlaqə saxlamağa çalışdıq. Zibil yeşiklərinin nəyə görə gec-gec boşaldılması sualına cavab ala bilməsək də, əvəzində bu sahədə çalışan, məsələnin görünməyən tərəfindəki üfunət qəhrəmanlarını tanıdıq. Mütəmadi olaraq işlərindən şikayət etdiyimiz hətta çox vaxt ünvanlarına nalayiq ifadələr səsləndirdiyimiz bu üfunət maşınında çalışanların səsini siz də eşidin.

 

Habil Kərimov – Zibil daşıyan: "Müraciət etmişik, heç kim yeşikləri dəyişmir, heç kim yeşiklərə baxmır. 380 manat maaş verir, o da qane etmir. Xəstə uşağım var, gözləri görmür. Yeriməyən yeşiklərdi. Əlimin içinin qabarına baxın. Heç kim də dəyişmir”.

 

Bəli, qarşı tərəfi dinlədikdən sonra mövcud vəziyyətdən ən çox əziyyət çəkənlərin təkcə sakinlər olmadığını, bu tullantıları zibil maşınına yığan işçilərin də nəqədər haqlı olduqlarını anladıq. Müsahibimiz bildirdi ki, bəzən zibil yeşikləri boş olsa da insanlar əllərində olan tullantıları yeşiyin ətrafına atır.

 

Bu da onların işini çətinləşdirir.